काठमाडौं– जाजरकोट लगायतका क्षेत्रमा आज फेरी ५.८ म्याग्निच्युडको भुकम्प गएको छ। दिउँसो ४ बजेर ३१ मिनेटमा उक्त भुकम्प गएको हो।

राष्ट्रिय भूकम्प मापन केन्द्रका अनुसार पहिलो पराकम्प महसुस भएको ९ मिनेटपछि ४ बजेर ४० मिनेटमा जाजरकोटकै पैंक केन्द्रविन्दु भएर ४.५ म्याग्निच्युडको अर्को झट्का महसुस गरिएको हो ।

शुक्रबारको भूकम्पले १२ जनाको मृत्यु भएको भेरी नगरपालिकाको राउतगाउँमा सोमबार ३ वटा घर भत्किएका छन । शुक्रबारको भूकम्पबाट जोगिएका धेरै घर सोमबारको भूकम्पले भत्काएको स्थानीयले जानकारी दिए ।

राउतगाउँमा भूकम्पमा परी एकजना घाइते भएका छन् । राउतगाउँ वरपरकै गाउँहरु भरावन र गैरी क्षेत्रमा पनि घरहरु भत्किएका छन् । शक्तिशाली परकम्प आउँदा ठूलो आवाज आउनुका साथै गाउँभरि नै घर भत्किएर धुलो उडेको देखिन्थ्यो ।

भूकम्पले थप घरहरु भत्किएको र मानिस समेत घाइते भएको जानकारी पाएपछि अस्थायी प्रहरी पोस्ट राउतगाउँको टोली गाउँघरतिर गएको छ ।

भूकम्पको झट्कासँगै मानिसहरू त्रसित भएका छन् । भुकम्पले गरेको क्षतीको थप विवरण आईरहेको प्रहरीले जनाएको छ।