काठमाडौँ– कलाकार पवन खतिवडा ‘म्याकुरी’लाई कुटपिट गरेको आरोपमा स्वघोषित सामाजिक अभियन्ता शर्मिला वाइबा पक्राउ परेकी छिन्।

काठमाडौं प्रहरीको अनुरोधमा सिन्धुपाल्चोक प्रहरीले उनलाई बाह्रबिसेबाट पक्राउ गरेको हो। वाईबाविरुद्ध प्रहरी वृत महाराजगञ्जमा मुद्दा दर्ता भएको छ। जिल्ला प्रहरी परिसर काठमाडौँले उनलाई पक्राउ गर्न सिन्धुपाल्चोक प्रहरीसँग समन्वय गरेको थियो।

केही दिनअघि शर्मिला, पवनकी पत्नी सुम्निमा खालिङ र बहिनी गंगा पवन बसेको घरमा गएर उनीमाथि कुटपिट गरेको आरोप छ। उनीविरुद्ध कुटपिट तथा अंगभंग सम्बन्धी कसुरमा मुद्दा दर्ता भएको जिल्ला प्रहरी परिसर काठमाडौँका एसपी नवराज अधिकारीले बताए।