इटहरी– सुनसरीको इटहरीमा एक सफारी चालकले शनिवार साँझ खुकुरीले हानेर साईकल यात्रीको हत्या गरेका छन्।

इटहरीमा सिटी सफारी चाउँदै आएका इटहरी उपमहानगरपालिका–७, वज्राहाका उमेश चौधरीले साईकलमा सवार २५ वर्षीय भीम (रामकुमार पण्डित)को खुकुरी प्रहार गरी हत्या गरेका हुन। भीम उमेशकै छिमेही हुन।

इलाका प्रहरी कार्यालय इटहरीका डिएसपी टेकबहादुर कार्कीका अनुसार बज्राहको प्लटिङ क्षेत्रमा सिटी सफारी र साइकल एक आपसमा ठक्किएर दुर्घटना भएको थियो। सोही विषयलाई लिएर सफारी चालक चौधरीले साइकलमा सवार रहेका पण्डितलाई खेदाएर खुकुरी प्रहार गरेको जनाईएको छ।

खुकुरी प्रहारबाट पण्डितको घटनास्थलमै मृत्यु भएको प्रहरीले जनाएको छ। वैदेशिक रोजगारीमा जाने तयारीमा रहेका भीम र उमेशका बीचमा पुरानो रिसईवी पनि हुन सक्ने प्रहारीको अनुमान छ। जानकारी अनुसार यस अगाडि पनि उमेशले भिमलाई रड प्रहार गरेका थिए।

चौधरीलाई पक्राउ गरिएको डिएसपी कार्कीले बताए।