काठमाण्डौं– भारतको बैंग्लोरमा खाना पकाउने ग्याँस लिक भई आगलागी हुँदा एकै परिवारका ५ जना नेपालीको मृत्यु भएको छ। आगलागीमा जलेर घाइते भएका बझाङको जयपृथ्वी नगरपालिका–११, सुइलका एकै परिवारका पाँच जनाको मृत्यु भएको हो ।

घट्नामा मदन बोहरा, उनकी श्रीमती प्रेमजला बोहरा, छोरा प्रशान्त, छोरीहरू अनिता र निताको उपचारका क्रममा मृत्यु भएको हो। गत बुधबार राति ११ बजेतिर सबै परिवार कोठामै भएको बेला खाना पकाउने क्रममा ग्याँस लिक हुँदा आगलागी भएको थियो ।

झ्याल नभएको कोठामा बसिरहेका उनीहरूको कोठामा ग्याँस लिक भएको र सलाई बाल्ने क्रममा आगलागी भएको थियो। सो आगोले जलेर बोहरा परिवारका सबै सदस्य घाइते भएका थिए। घाइते पाँचै जनालाई भिक्टोरिया अस्पताल लगिएको थियो।

घाइतेमध्ये ८ वर्षीया छोरी अनिता र साढे चार वर्षका छोरा प्रशान्तको जलेर सोही दिन मृत्यु भएको थियो भने ३० वर्षीया प्रेमजलाको शनिवार साँझ मृत्यु भएको थियो। छोरी निता र बुवा मदन बोहराको सोमबार बिहान मृत्यु भएको जनाईएको छ।

बैंग्लोरको एउटा अपार्टमेन्टमा चौकीदारको काम गरिरहेका मदन विगत ६ वर्षदेखि परिवारसहित उतै बस्दै आएका थिए। उनकी श्रीमती स्थानीयको घरमा सरसफाइको काम गर्दै गर्थिन। छोराछोरी त्यहीको स्थानीय विद्यालयमा पढ्ने गरेका थिए।