सेञ्चुरी बैंकका तत्कालीन अध्यक्ष श्रेष्ठसहित ९ जना पक्राउ

काठमाडौं– कर्जा दुरुपयोगको आरोपमा सेञ्चुरी बैंकका तत्कालीन अध्यक्ष राजेश श्रेष्ठसहित ९ जना पक्राउ गरेका छन्।

नेपाल प्रहरीको केन्द्रीय अनुसन्धान ब्यूरो (सीआईबी) ले ठगीको मुद्दामा अनुसन्धानका लागि श्रेष्ठसँगै तत्कालीन सञ्चालक समिति सदस्य अभिषेक बज्राचार्य, सुनिलकुमार न्यौपाने, प्राडा गीता प्रधान, रमेश कुमार निरौला, रणबहादुर श्रेष्ठ, राजेश कुमार दली, उमाकुमारी श्रेष्ठ र शिवगोपाल रिसाललाई पक्राउ परेको हो।

बज्राचार्य सुनसरीको धरानबाट पक्राउ परेका हुन। कमसल धितोमा बढी कर्जा प्रवाह गरेको आरोपमा १५ फागुन २०८० मा तत्कालीन सेञ्चुरी बैंकका प्रमुख कार्यकारी अधिकृत (सीईओ) मनोज न्यौपाने र तुलसी गौतमसहितका कर्मचारी पक्राउ परेका थिए।

देउराली सहकारी र रवीन्द्र चौलागाईंका विभिन्न कम्पनीलाई कमसल धितोकै आधारमा बैंकबाट कर्जा प्रवाह गरी घोटाला गरेको आरोप उनीहरुमाथि छ। कमसल धितोमा दुई अर्ब ११ करोड ६५ लाख ५५ हजार रुपैयाँ बराबरको कर्जा प्रवाह गरेको सीआईबीले बताएको छ।

उक्त ऋण धितोभन्दा ९७ करोड ४१ लाख ७० हजार ७ सय ७२ रुपैयाँले बढी पाइएको सीआईबीको दाबी थियो। उनीहरु १ चैतमा हाजिर जमानीमा छुटेका थिए। हाल सेञ्चुरी बैंक प्रभु बैंकमा गाभिएको छ।


प्रतिक्रिया

Leave a Reply

Your email address will not be published. Required fields are marked *