रक्सीले मातेका बुबाछोराको भिडन्तमा छोराको मृत्यु, बुबा प्रहरी हिरासतमा
शीर्ष खबर 
काठमाडौँ– लमजुङको मर्स्याङदीमा रक्सीले मातेका बुबाछोराको भिडन्तमा छोराको ज्यान गएको छ। मर्स्याङदी गाउँपालिका–२ घनपोखरा प्रोबीका ५७ वर्षीय बुबा सन्तबहादुर तामाङ र २७ वर्षीय सोमबहादुरको भिडन्त भएको हो।
प्रहरीका अनुसार शुक्रबार साँझ करिव ६ बजे दुवैजना रक्सी सेवन गरेर बसेका थिए। त्यसैबेला आपसमा झगडा भएपछि घटना घटेको हो। लमजुङ प्रहरीका डीएसपी निशान्त श्रीवास्तवका अनुसार सुरुमा छोराले बुबालाई मुक्का हानेको र त्यसपछि बुबाले नजिकैको हँसिया लिएर प्रहार गर्दा छोराको घाँटीमा लागेर ज्यान गएको उनको हो।
हँसिया प्रहारबाट गम्भीर घाइते भएका सोमबहादुरलाई राती करिव ८ बजे बेंसीसहरस्थित लमजुङ अस्पतालमा सामान्य उपचार गरेर चितवनको भरतपुर अस्पताल लगिएको थियो। त्यहाँ उपचारका क्रममा शनिबार बिहान सवा ३ बजे सोमबहादुरको मृत्यु भएको डीएसपी श्रीवास्तवले बताए।
घटनापछि खुदी प्रहरी चौकीले सन्तबहादुरलाई पक्राउ गरी जिल्ला प्रहरी कार्यालय ल्याइएको छ।
