झापामा बसले साईकललाई ठक्कर दिँदा वर्थडे केक र मासु लिएर फर्कदै गरेका नातिनी–बाजेको मृत्यु
शीर्ष खबर 
दमक– झापामा बसले इलेक्ट्रिक साइकललाई ठक्कर दिँदा बुधबार साँझ २ जनाको घट्नास्थमै मृत्यु भएको छ। मृत्यु हुने हजुरबुवा र नातिनी हुन।
पूर्वबाट काठमाडौँ जाँदै गरेको प्र. १–०१–००१ ख ४३३१ नम्बरको बसले कमल गाउँपालिका– ३ स्थित केर्खामा इलेक्ट्रिक साइकललाई ठक्कर दिँदा उनीहरुको मृत्यु भएको हो। बसको ठक्करबाट कमल गाउँपालिका–३ का टेकबहादुर लिम्बू (६०) र उनकी नातिनी कृपा लिम्बू (१२) को मृत्यु भएको हो।
दुर्घटनापछि आक्रोशित स्थानीयले बसमा तोडफोड गरेका छन्। आगजनी गर्ने प्रयास भएपछि प्रहरीले बसलाई नियन्त्रणमा लिएर प्रहरी चौकी केर्खामा राखेको छ। त्यसपछि भिडले प्रहरी चौकीमा समेत ढुङ्गाामुढा गरेको छ।
स्थानीयको प्रदर्शनले राजमार्ग अवरुद्ध भएको छ। स्थानीयले बस चालकको खोजी गरिरहेका छन। चालकलाई नल्याएसम्म सडकबाट शव उठाउन नदिने उनीहरुको अडान छ।
स्थानीयका अनुसार आज बालिकाको जन्मदिन थियो। नातिनीको बर्थडे मनाउन केक लिन हजुरबुबा र नातिनी घरबाट हिडेका थिए। केक र मासु लिएर घर फर्कदै गर्दा उनीहरुको साईकललाई बसले ठक्कर दिएको जनाईएको छ।
दुर्घटनापछि केक र मासु सडकभरि छरपष्ट छ।
