जयपुर– भारतको राजस्थानस्थित जयपुरमा मदरसामा पढ्ने १८ वर्षीया छात्रासँग निकाह गरेका मौलाना वकार अहमद विवादमा परेका छन्। पहिले नै विवाहित र तीन सन्तानका पिता रहेका उनले आफ्नै मदरसामा अध्ययन गर्ने युवतीसँग निकाह गरेको घटना सार्वजनिक भएपछि युवतीका परिवार र स्थानीयवासी आक्रोशित भएका हुन्।

विवाद यतिसम्म चर्कियो कि अदालतमा उपस्थित गराएर बाहिर निकाल्ने क्रममा आक्रोशित समूहले प्रहरीकै अगाडि मौलानामाथि लात्ती र मुक्का प्रहार गर्‍यो। घटना जयपुरको जयसिंहपुरा खोर थाना क्षेत्रअन्तर्गत नाई की थडीस्थित एक मदरसासँग सम्बन्धित छ। प्रहरीका अनुसार वकार अहमद उक्त मदरसामा मौलानाका रूपमा अध्यापन गर्थे।

सोही क्रममा त्यहाँ अध्ययन गर्न आउने १८ वर्षीया युवतीसँग उनको निकटता बढेको थियो। पछि उनीहरूबीच निकाह भएको विषय सार्वजनिक भएपछि विवाद सुरु भएको हो। प्रहरीका अनुसार मौलाना पहिले नै विवाहित थिए र उनका तीन सन्तानसमेत छन्। युवतीका परिवारले यो कुरा थाहा पाएपछि निकाहप्रति असहमति जनाएका थिए।

परिवारका सदस्यले युवतीलाई सम्झाउने प्रयास गरे पनि उनी मौलानासँगै निकाह गर्ने अडानमा रहेको बताइएको छ। अन्ततः परिवारको सहमतिबिनै उनीहरूबीच निकाह भएको भारतीय सञ्चारमाध्यमले जनाएका छन्।

निकाहको जानकारी पाएपछि युवतीका परिवारले जयसिंहपुरा खोर प्रहरी चौकीमा उजुरी दिएका थिए। त्यसपछि स्थानीयवासीसमेत मौलानाविरुद्ध कारबाहीको माग गर्दै प्रहरी कार्यालय पुगेका थिए। विरोध बढेपछि प्रहरीले मौलानालाई शान्ति भंग गरेको आरोपमा नियन्त्रणमा लिएको थियो।

शनिबार दिउँसो प्रहरीले उनलाई अदालतमा उपस्थित गराएको थियो। अदालतबाट बाहिर निकाल्ने क्रममा आक्रोशित समूहले मौलानालाई घेरा हालेर कुटपिट गरेको हो। प्रहरीकै उपस्थितिमा उनीमाथि लात्ती र मुक्का प्रहार गरिएको थियो। अचानक भएको आक्रमणपछि अदालत परिसरमा तनाव र भागदौडको अवस्था सिर्जना भएको थियो।

प्रहरीले निकै प्रयासपछि उनलाई भीडबाट उद्वार गरी सुरक्षित स्थानमा पुर्‍याएको थियो। घटनाको भिडियो सामाजिक सञ्जालमा सार्वजनिक भएपछि विषय थप चर्चामा आएको छ। यता, युवतीले भने आफू १८ वर्ष पुगेको र आफ्नै इच्छाले मौलानासँग निकाह गरेको दाबी गरेकी छन्। उनले आफ्नो निर्णय स्वेच्छिक भएको बताउँदै भिडियोसमेत सार्वजनिक गरेको भारतीय सञ्चारमाध्यमले जनाएका छन्।

युवतीको यस्तो दाबीले परिवारको असहमति र मौलानामाथि लागेको प्रभावमा पारेको आरोपबीच घटनालाई थप विवादित बनाएको छ। प्रहरीले युवतीको उमेरसम्बन्धी कागजात र बयानका आधारमा घटनाको थप अनुसन्धान गरिरहेको छ। मौलानाले मदरसामा अध्ययन गर्न आउने अन्य छात्राहरूलाई समेत आफ्नो प्रभावमा पार्ने प्रयास गरेको आरोप पनि लागेको छ। तर यी आरोपहरू अनुसन्धानबाट पुष्टि हुन बाँकी छन्।

यस घटनाले एउटा महत्वपूर्ण प्रश्नसमेत उठाएको छ—१८ वर्ष पुगेकी युवतीले आफ्नो इच्छाले विवाह गर्ने अधिकार राख्छिन् कि राख्दिनन् भन्ने बहसभन्दा अलग, शिक्षक र विद्यार्थीबीचको सम्बन्धमा रहेको शक्ति तथा प्रभावको सम्भावित दुरुपयोगबारे निष्पक्ष अनुसन्धान हुनुपर्छ। आरोप प्रमाणित गर्ने जिम्मेवारी प्रहरी र न्यायिक प्रक्रियाको हो। भीडले अदालत परिसरमै कुटपिट गर्नु भने कानुन हातमा लिने कार्य हो।