काठमाडौँ– राष्ट्रिय स्वतन्त्र पार्टी (रास्वपा) बाट सप्तरी निर्वाचन क्षेत्र नम्बर–१ मा निर्वाचित सांसद पुष्पाकुमारी चौधरी पनि चिनियाँ कम्युनिस्ट पार्टी (सीपीसी) को निमन्त्रणामा चीन भ्रमणमा जाने भएकी छिन्। रास्वपाका महामन्त्री विपिनकुमार आचार्यको नेतृत्वमा २० सदस्यीय प्रतिनिधिमण्डल आगामी कात्तिक २९ गतेदेखि ११ दिने भ्रमणका लागि चीन प्रस्थान गर्न लागेको हो।

सत्तारुढ दलका सांसदहरू चीनको औद्योगिक विकास, अत्याधुनिक प्रविधि, रोबोटिक्स, तीव्र गतिको रेल, कृषि आधुनिकीकरण, विपद् व्यवस्थापन, ग्रामीण शासन प्रणाली र पार्टी सञ्चालनका अभ्यासबारे अध्ययन गर्न जान लागेको हो।

भ्रमण टोलीले सिचुवान प्रान्तको छेङ्दुबाट आफ्नो अध्ययन यात्रा सुरु गर्नेछ। त्यसपछि जेजियाङ प्रान्त हुँदै राजधानी बेइजिङ पुगेर उच्च तहका चिनियाँ कम्युनिस्ट पार्टीका नेताहरूसँग भेटवार्ता गर्ने कार्यक्रम छ। नोभेम्बर १५ देखि २६ सम्म हुने भ्रमणमा रास्वपा टोलीले चीनले विकासका विभिन्न क्षेत्रमा हासिल गरेका उपलब्धि र त्यसको संस्थागत अभ्यासबारे जानकारी लिनेछ।

भ्रमणको पहिलो चरण सिचुवान प्रान्तमा केन्द्रित हुनेछ। नोभेम्बर १६ मा टोलीले त्यहाँको ‘हाइटेक इन्टरप्राइजेज एन्ड इन्डस्ट्रियल पार्क’ अवलोकन गर्नेछ। त्यसैदिन चिनियाँ कम्युनिस्ट पार्टीको पार्टी स्कुलका नेताहरूसँग विचार आदानप्रदान गर्ने कार्यक्रम छ। रास्वपाको तर्फबाट महामन्त्री आचार्यले आफ्नो धारणा राख्नेछन्।

नोभेम्बर १७ मा टोलीले सन् २००८ को विनाशकारी भूकम्पबाट प्रभावित वेन्चुआन क्षेत्रको भ्रमण गर्नेछ। उक्त भूकम्पमा ठूलो जनधनको क्षति भएको थियो। भूकम्पपछिको पुनर्निर्माण, विपद् व्यवस्थापन र प्रभावित क्षेत्रलाई पुनःस्थापित गर्न अपनाइएका उपायबारे टोलीले अध्ययन गर्नेछ।

नोभेम्बर १८ मा छेङ्दुस्थित ‘जायन्ट पाण्डा ब्रीडिङ’ केन्द्रको अध्ययन भ्रमण हुनेछ। त्यसैदिन सिचुवान विश्वविद्यालयमा विपद् प्रतिकार्य व्यवस्थापनसम्बन्धी अन्तरक्रियामा सहभागी हुने कार्यक्रम छ। यसबाट विपद्को जोखिममा रहेको नेपालले चीनको अनुभवबाट के सिक्न सक्छ भन्ने विषयमा छलफल हुने अपेक्षा गरिएको छ।

त्यसपछि टोली जेजियाङ प्रान्त जानेछ। नोभेम्बर १९ मा त्यहाँ पुग्ने प्रतिनिधिमण्डलले नोभेम्बर २० मा रोबोटिक्स प्रविधि क्षेत्र र औद्योगिक पार्कको भ्रमण गर्नेछ। औद्योगिक उत्पादनमा प्रविधिको प्रयोग, स्वचालन र आधुनिक उद्योग सञ्चालनका अभ्यासबारे जानकारी लिने कार्यक्रम छ।

नोभेम्बर २१ मा टोलीले तीव्र गतिको रेलमार्फत यात्रा गर्दै यीवू अन्तर्राष्ट्रिय व्यापार केन्द्रको अवलोकन गर्नेछ। त्यसैदिन ग्रामीण सरकार सञ्चालन र तल्लो तहमा पार्टी संगठन निर्माणसम्बन्धी अभ्यासबारे अध्ययन गर्ने कार्यक्रम पनि छ। चीनको स्थानीय प्रशासन, ग्रामीण विकास र पार्टीको संगठनात्मक संरचनाबारे बुझ्ने अवसरका रूपमा यो भ्रमणलाई लिइएको छ।

नोभेम्बर २२ मा जेजियाङ विश्वविद्यालयमा थिंक ट्यांक विकाससम्बन्धी अध्ययन हुनेछ। नीति निर्माणमा अनुसन्धान संस्थाको भूमिका, ज्ञान उत्पादन र सरकारलाई नीतिगत सुझाव दिने संस्थागत संरचनाबारे टोलीले जानकारी लिनेछ।

नोभेम्बर २३ मा जिन्ह्वामा चीन–नेपाल उद्यमीबीच ‘इन्टरप्राइजेज म्याचमेकिङ कन्फ्रेन्स’ आयोजना हुनेछ। उक्त कार्यक्रममा नेपाली र चिनियाँ उद्यमीबीच व्यावसायिक सम्बन्ध, लगानी र सहकार्यका सम्भावनाबारे छलफल हुनेछ। रास्वपा प्रतिनिधिमण्डलको तर्फबाट महामन्त्री आचार्यले धारणा राख्ने कार्यक्रम छ।

नोभेम्बर २४ मा टोली राजधानी बेइजिङ प्रस्थान गर्नेछ। त्यहाँ चिनियाँ कम्युनिस्ट पार्टीका उच्च तहका नेताहरूसँग भेटवार्ता, पार्टीका विज्ञहरूसँग छलफल तथा सीपीसीको ऐतिहासिक संग्रहालय अवलोकन गर्ने कार्यक्रम तय भएको छ। ११ दिने भ्रमण पूरा गरी टोली नोभेम्बर २६ मा नेपाल फर्कनेछ।

सप्तरी–१ की सांसद पुष्पाकुमारी चौधरी पनि प्रतिनिधिमण्डलमा
यो भ्रमणमा सप्तरी क्षेत्र नम्बर–१ बाट निर्वाचित रास्वपा सांसद पुष्पाकुमारी चौधरी पनि सहभागी हुँदैछिन्। स्वास्थ्य क्षेत्रको अनुभवसहित राजनीतिमा आएकी चौधरीले प्रतिनिधिसभामा सप्तरीको प्रतिनिधित्व गर्छिन्। उनीसहित रास्वपाका विभिन्न क्षेत्रका सांसद तथा पार्टी पदाधिकारी चीन जान लागेका हुन्।

टोलीमा महामन्त्री आचार्यसँगै सहमहामन्त्री हरि ढकाल, संसदीय दलका उपनेता गणेश पराजुली र प्रमुख सचेतक कविन्द्र बुर्लाकोटी छन्। सांसदहरू लिमा अधिकारी आचार्य, समीक्षा बाँस्कोटा, सागर ढकाल, डा. आनन्दबहादुर चन्द, सुशान्त वैदिक, रिमा विश्वकर्मा, डा. धनञ्जय रेग्मी, श्रीराम न्यौपाने, डा. राम लामा, गजला शमिम मिकरानी, पुनम अग्रवाल, रत्ना थापा, डा. सुजाता तामाङ, पुष्पाकुमारी चौधरी, अरविन्द शाह र रमेश सापकोटा पनि प्रतिनिधिमण्डलमा छन्।

भ्रमणको उद्देश्य के ?
रास्वपाले यस भ्रमणलाई सुशासन, आर्थिक विकास, सार्वजनिक सेवा प्रवाह, संस्थागत क्षमता अभिवृद्धि र जनअपेक्षाअनुसारको राजनीतिक नेतृत्वबारे अनुभव आदानप्रदान गर्ने अवसरका रूपमा व्याख्या गरेको छ। पार्टी प्रवक्ता जगदीश खरेलले जारी गरेको विज्ञप्तिमा नेपाल र चीनबीच राजनीतिक संवाद, आपसी समझदारी र विकास सहकार्यलाई थप सुदृढ गर्ने उद्देश्य रहेको उल्लेख छ।

तर, भ्रमणको कार्यतालिका हेर्दा यसको दायरा राजनीतिक संवादमा मात्र सीमित छैन। चीनको औद्योगिक विकास, प्रविधि हस्तान्तरण, रोबोटिक्स, व्यापार, ग्रामीण प्रशासन र नीति निर्माणका संस्थागत अभ्याससम्म टोलीको अध्ययन फैलिएको छ।

विशेषगरी नेपालको कृषि, स्वास्थ्य, शिक्षा, सार्वजनिक सेवा, औद्योगिक उत्पादन र उद्यमशीलता विकासमा चीनको प्रविधि तथा अनुभव कसरी उपयोग गर्न सकिन्छ भन्ने विषय भ्रमणको महत्वपूर्ण पक्ष बन्न सक्छ। प्रतिनिधिमण्डलका सदस्य डा. आनन्दबहादुर चन्दले चीनको नवप्रवर्तन, कृत्रिम बुद्धिमत्ता, मेसिन लर्निङ, डिजिटल प्रविधि र औद्योगिक विकासबारे अध्ययन गर्ने रुचि व्यक्त गरेका छन्।

प्रधानमन्त्री बालेनको निर्देशनः घुमघाममा सीमित नराख्नु
चीन प्रस्थान गर्नुअघि रास्वपाको प्रतिनिधिमण्डलले शुक्रबार प्रधानमन्त्री बालेन्द्र (बालेन) साहसँग भेटवार्ता गरेको थियो। सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको छलफलमा प्रधानमन्त्रीले भ्रमणलाई केवल घुमघाममा सीमित नराखी नेपालको राष्ट्रिय हित र विकासका सम्भावनासँग जोड्न निर्देशन दिएका छन्।

प्रधानमन्त्रीले चीनसँग नेपालको तर्फबाट राख्नुपर्ने विषय निर्धक्क रूपमा प्रस्तुत गर्न, दुई देशबीचको सम्बन्ध सुदृढ बनाउन र प्रविधि, व्यापार, पर्यटन, कृषि तथा आर्थिक सहकार्यका सम्भावना पहिचान गर्न सुझाव दिएका थिए।

रास्वपाका प्रमुख सचेतक कविन्द्र बुर्लाकोटीका अनुसार प्रधानमन्त्रीले चीनबाट नेपालले लिन सक्ने आर्थिक तथा प्राविधिक लाभका विषयमा गम्भीर अध्ययन गर्न जोड दिएका थिए। भ्रमणबाट प्राप्त अनुभव र सम्भावनालाई नेपालको विकासमा उपयोग गर्नुपर्ने उनको सुझाव थियो।

टोलीले नेपाल–चीन सीमासम्बन्धी विषय भने भ्रमणको कार्यसूचीमा नरहेको स्पष्ट पारेको छ। पार्टी तहको निमन्त्रणामा हुन लागेको भ्रमण भएकाले यसको मुख्य केन्द्र आर्थिक, प्राविधिक र राजनीतिक अनुभव आदानप्रदान रहने बताइएको छ।

चिनियाँ कम्युनिस्ट पार्टीको निमन्त्रणामा हुन लागेको यो भ्रमणलाई रास्वपाले दुई देशबीचको सम्बन्ध विस्तार र विकास सहकार्यको अवसरका रूपमा लिएको छ। तर, भ्रमणपछि नेपालले कुन क्षेत्रमा के सिक्यो, त्यसलाई नीति तथा कार्यक्रममा कसरी उपयोग गर्छ र नेपाली जनताले त्यसको प्रत्यक्ष लाभ कसरी पाउँछन् भन्ने प्रश्न महत्वपूर्ण रहनेछ।

सप्तरी–१ सहित विभिन्न निर्वाचन क्षेत्रबाट निर्वाचित सांसदहरू सहभागी हुने यो भ्रमणको वास्तविक उपलब्धि चीनका विकास आयोजना र प्रविधि अवलोकन गर्नुमा मात्र सीमित हुनु हुँदैन। भ्रमणबाट प्राप्त ज्ञान, अनुभव र सम्भावित सहकार्यलाई नेपालको कृषि, उद्योग, शिक्षा, स्वास्थ्य, पूर्वाधार तथा सार्वजनिक सेवा सुधारमा रूपान्तरण गर्न सक्नु नै यसको सफलताको मुख्य आधार हुनेछ।