पत्नीलाई खाना पुर्याउन अस्पताल पुगेका मैतुन मृत भेटिए, रहस्यमय भन्दै आफन्तको आक्रोश! अस्पतालमा ढुंगामुढा !
शीर्ष खबर 
जनकपुर— जनकपुरस्थित प्रादेशिक अस्पताल परिसरमा एक व्यक्ति मृत फेला परेपछि तनाव उत्पन्न भएको छ। अस्पतालमा भर्ना भएकी बिरामी पत्नीका लागि खाना लिएर आएका धनुषाको क्षीरेश्वरनाथ नगरपालिका–२ का मैतुन सादा अस्पतालको शवगृहको पर्खालछेउ मृत अवस्थामा भेटिएका हुन्।
उनको मृत्यु स्वाभाविक नभई षड्यन्त्रपूर्वक हत्या गरेर अस्पताल परिसरमा फालिएको आफन्तले आरोप लगाएपछि स्थिति तनावपूर्ण बनेको हो। प्रहरीका अनुसार विहिबार बिहान करिब साढे ११ बजे अस्पतालको शवगृहको पर्खालछेउ सदा मृत भेटिएका थिए। उनी करिब तीन दिनअघि प्रसूति वार्डमा भर्ना भएकी आफ्नी श्रीमतीलाई खाना पुर्याउन अस्पताल आएका थिए। अस्पतालमा बिरामी कुरुवाका रूपमा रहेका उनी एकाएक मृत भेटिएपछि घटनाले अस्पताल परिसरमा खैलाबैला मच्चाएको थियो।
मृतकको पहिचान खुलेपछि आफन्तजन अस्पताल पुगेका थिए। घटनाको प्रकृतिबारे शंका व्यक्त गर्दै उनीहरूले मैतुनको मृत्यु सामान्य नभएको र कसैले हत्या गरेर शव त्यहाँ फालेको आरोप लगाए। करिब ४० जनाको संख्यामा भेला भएका परिवारका सदस्य तथा आफन्तले घटनाको निष्पक्ष छानबिन र दोषीमाथि कारबाहीको माग गर्दै प्रदर्शन सुरु गरेका थिए।
प्रदर्शनका क्रममा आफन्तले अस्पतालको मुख्य गेटमा ढुंगामुढा गरेका थिए। उनीहरूले अस्पताल रोडमा चक्काजामसमेत गरेपछि अस्पताल क्षेत्रको अवस्था तनावपूर्ण बनेको थियो। घटनामा प्रहरी प्रशासनले उचित प्रक्रिया नअपनाएको भन्दै आफन्तले आक्रोश व्यक्त गरेका थिए।
आफन्तको मुख्य आपत्ति मृतकको शव पोस्टमार्टम गृहमा राखिएको विषयमा देखिएको छ। उनीहरूले परिवारको सहमतिबिना शव पोस्टमार्टम गृहमा राखेर घटनालाई दबाउन खोजिएको आरोप लगाएका छन्। प्रहरीका अनुसार मृतकको शव व्यवस्थापनका लागि सम्बन्धित व्यक्तिलाई बोलाइएको थियो। तर, परिवारका सदस्यले हत्या भएको आशंका गर्दै शव नउठाउन भनेपछि विवाद चर्किएको बताइएको छ।
मृतक मैतुनलाई कुनै दीर्घरोग वा स्वास्थ्य समस्या थियो कि थिएन भन्ने विषयमा आफन्तले स्पष्ट जानकारी दिएका छैनन्। उनको मृत्युको कारणसमेत खुलिसकेको छैन। प्रहरीले घटनाबारे थप विवरण अनुसन्धानपछि सार्वजनिक गर्ने जनाएको छ।
अस्पतालमा उपचाररत बिरामीको कुरुवा बनेर आएका व्यक्ति त्यहीँ मृत भेटिनु र मृत्युको कारणबारे तत्काल स्पष्ट जानकारी नआउनुले घटनालाई थप रहस्यमय बनाएको छ। आफन्तले हत्या भएको आशंका गरे पनि त्यसको पुष्टि भइसकेको छैन। मृत्युको वास्तविक कारण पत्ता लगाउन शव परीक्षण, घटनास्थलको अवस्था र उपलब्ध प्रमाणको अनुसन्धान महत्वपूर्ण हुनेछ।
अहिले घटनाबारे थप विवरण आउन बाँकी छ। मृतकको मृत्यु कसरी भयो, अस्पताल परिसरमा उनी कुन अवस्थामा पुगे र घटनामा कुनै आपराधिक संलग्नता छ कि छैन भन्ने प्रश्नको जवाफ प्रहरी अनुसन्धान तथा पोस्टमार्टम प्रतिवेदनपछि मात्रै स्पष्ट हुनेछ।
