उपचार गर्न गएकी लक्ष्मी २५ दिनको छोरा र आमासहित बाटैमा अस्ताईन
शीर्ष खबर 
काठमाडौँ– २५ दिने नाबालक छोरालाई श्वासप्रश्वासमा समस्या देखिएपछि जाजरकोटको नलगाड नगरपालिका–३, करूवाकी १८ वर्षीया लक्ष्मी पुन सोमबार उपचारका लागि डिल्लीबजार पुगिन। डिल्लीबजार आउ–जाउ गर्न उनीहरुलाई हिडेर करिव ३ घण्टा लाग्छ।
आफु पनि दाँत दुखेर हैरान भएकी उनी पहिलैदेखि विरामी आमा ६५ वर्षीया सुशीला पुनसमेतलाई लिएर उपचारका लागि गएकी थिईन। उनको घर र माईती आधी घण्टाको दुरीमा छ। चिकित्सकको सल्लाहअनुसार लक्ष्मीको दाँत उखेलियो। छोरा र आमाको पनि सामान्य उपचार गराईन।
उपचारपछि बुधबार उनीहरु घर फर्किने तयारीमा लागे। सवै जना बिरामी, त्यसमाथि महिना दिनकी सुत्केरी भएकाले उनीहरूले जिपमा घर जाने निधो गरे। दिउँसै घर फर्कने तयारी गरे पनि उनीहरूले गाउँसम्म पुग्ने गाडी पाएनन्। अबेर गरी करिव ७ बजे जिप पाए र त्यसैमा चढेर उनीहरू घर फर्कंदै थिए।
घर पुग्न करिब आधा घण्टा बाँकी थियो। लक्ष्मीले श्रीमान् टेकबहादुर रोकालाई बाटोबाटै फोन गरेर आधी घन्टामा घर पुग्ने बताएकी थिईन। टेकबहादुरले खाना बनाएर राखे। तर, उनीहरु भनेको समयमा घर पुगेनन्। फोन गर्दा पनि उठेन। टेकबहादुर छटपिटन थाले। रातको ११ बज्यो। उनीहरु खोज्न निस्किए।
यता, लक्ष्मी, उनका छोरा आलोचन र आमा चढेको ग ३ च ९८४५ नम्बरको बोलेरो जिप राती करिव ११ बजे नै कैना–कड्के सडक खण्ड अन्तर्गत नलगाड नगरपालिका–५ स्थित वीरखोला नजिकै दुर्घटनामा पर्यो। खोज्दै गएका टेकबहादुर लगायत राति करिब १२ बजे घटनास्थलमा पुगे।
घटनास्थलमा प्रहरी र केही स्थानीय भेला भइसकेका थिए। घाइतेहरूलाई निकाल्ने काम चलिरहेको थियो। लक्ष्मीसहित तीनै जनालाई उद्धार गरेर उपचारका लागि नगर अस्पताल पु¥याइएको थियो। तर, अस्पतालले मृत घोषणा गरिदियो। दुर्घटनामा लक्ष्मीको परिवारका तीनसहित पाँच जनाको मृत्यु भएको छ।
जिल्ला प्रहरी कार्यालय जाजरकोटका अनुसार लक्ष्मीकै गाउँका जिप चालक ३१ वर्षीय इन्द्रजित थापा, ३३ वर्षीय शारदा थापाको पनि मृत्यु भएको छ। दुई जना घाईते मध्ये एक जनाको उपचार भइरहेको छ भने अर्का एक जना डिस्चार्ज भईसकेको छ।
घाइतेहरूका अनुसार जिप मोड्न खोज्दा ब्रेक नलागेर सडकबाट तल खसेको थियो। दुर्घट्नामा परेको जिप सडकबाट करिव ८ सय मिटर तल खसेको छ।
