राजविराज– अख्तियार दुरूपयोग अनुसन्धान आयोगका अनुशन्धान अधिकृतलाई १ लाख रुपयाँ घुस दिन खोज्ने नुवाकोटको किस्पाङ गाउँपालिकाका प्रमुख प्रशासकीय अधिकृत ध्रुवप्रसाद सापकोटा पक्राउ परेका छन्।

आयोगको कञ्चनपुरमा रहेको कार्यालयबाट सापकोटा पक्राउ परेका हुन। उनी आफ्नो मुद्दा मिलाइ दिनू भन्दैे आयोगको कार्यालयमा आएका थिए।

आयोगका प्रवक्ता नरहरि घिमिरेका अनुसार सापकोटाले अछामको मेल्लेख गाउँपालिकामा प्रमुख प्रशासकीय अधिकृत हुँदा मेसिनरी सामान खरिदमा भ्रष्टाचार गरेको भन्दै उजुरी परेको थियो। उजुरीमाथि आयोगको कञ्चनपुर कार्यालयले अनुसन्धान गर्दै स्थलगत मुचुल्का र आरोपीहरूको बयान लिने काम सम्पन्न गरिसकेको छ।

त्यसै सिलसिलामा सापकोटा केही कागजात बुझाउन भन्दै कञ्चनपुर कार्यालयका अनुसन्धान अधिकृतको कार्यकक्षमा पुगेका थिए। उनले कागजातसहितको खाम अनुसन्धान अधिकृतलाई दिन खोजे।

अधिकृतले आफैले खोलेर दिनू भनेपछि सापकोटाले हरियो रंगको झोलाबाट ३१ थान कागजात निकाले र सँगै पहेंलो खामबाट निकालेर पैसा पनि दिन खोजे। ‘यो के को पैसा हो’ भनेर सोध्दा उनले ‘मुद्दा मिलाइदिन तपाईंका लागि स्वेच्छाले ल्याएको’ भनी जबाफ दिएको आयोगको विज्ञप्तिमा छ।

त्यसपछि उनलाई नियन्त्रणमा लिईएको हो। उनले हजार रूपैयाँ दरका नोट ९६ वटा र ५ सय दरका नोट ८ वटा अनुशन्धान अधिकृतलाई दिन खोजेको पाईएको छ।