मुम्बई- अनलाइन स्पोर्ट्स प्लेटफर्म ‘ड्रीम ११’ मा १.५ करोड भारतीय रुपैयाँ जित्ने एक प्रहरी अधिकृत सोमनाथ जेन्डेलाई महाराष्ट्र सरकारले सेवाबाट निलम्बन गरेको छ।

सोमनाथ जेन्डेले विभागको आचारसंहिता उल्लंघन गरेको भन्दै निलम्बन गरिएको हो। जेन्डेले भने आरोप अस्वीकार गरेका छन् । महाराष्ट्रको पुणे स्थित पिम्परी चिंचवड प्रहरी चौकीमा सब इन्स्पेक्टर रहेका सोमनाथले बीबीसी मराठीलाई ‘बिना अनुमति अनलाइन गेम खेलेको र वर्दीमा मिडियालाई अन्तर्वार्ता दिएको’मा निलम्बन गरिएको जानकारी दिए ।

सोमनाथ जेन्डेले आफूमाथि अन्याय भइरहेको बताएका छन् । सोमनाथले गत महिना मात्रै ड्रीम ११ मा अनलाइन गेम खेल्न थालेको बताए । एक खेल जितेपछि अक्टोबर १० मा उनले १.५ करोड रुपैयाँ पुरस्कार जिते । ड्रीम ११ ले आफैलाई ‘सीपको खेल’ को रूपमा वर्णन गर्दछ।

२०२१ को सर्वोच्च अदालतको निर्णय कम्पनीको वेबसाइटमा उद्धृत गरिएको छ, जस अनुसार ‘ड्रीम ११’ को प्लेटफर्म देशको जुवा सम्बन्धी कानूनको दायरामा आउँदैन। भारतमा जुवा खेल्नु गैरकानूनी छ तर अनलाइन गेमिङ उद्योगसँग सम्बन्धित केही व्यक्तिहरूले उनीहरूको प्लेटफर्ममा खेलाइएका खेलहरू जुवाभन्दा फरक छन् भनी तर्क गर्छन्।

क्रिकेटर एमएस धोनी र बलिउड अभिनेता आमिर खानले अनलाइन गेमिङ प्लेटफर्म ‘ड्रिम ११’ लाई प्रमोट गरेका छन् । यस प्लेटफर्मले ११ वर्ष भन्दा माथिका खेल प्रशंसकहरूलाई क्रिकेट, हक्की, फुटबल र बास्केटबल अनलाइन खेल्ने अवसर दिन्छ। प्रयोगकर्ताहरूले वास्तविक जीवनका खेलाडीहरूको नाम प्रयोग गरेर भर्चुअल टोलीहरू सिर्जना गर्छन्।

वास्तविक खेलहरूमा यी खेलाडीहरूको प्रदर्शनको आधारमा, प्रयोगकर्ताहरूले अंक कमाउने मौका पाउँछन्।

भारतमा जारी विश्वकप क्रिकेटमा बंगलादेश र इंग्ल्याण्डबीच खेल भइरहेको बेला सोमनाथ जेन्डेले सोही खेलमा यो पुरस्कार जितेका थिए । रिपोर्टका अनुसार अनलाइन गेम जितेपछि सोमनाथ जेन्डे प्रहरी वर्दीमा मिडियालाई अन्तर्वार्ता दिंदै देखिएका थिए ।

सत्तारुढ दल भाजपाका कार्यकर्ता अमोल थोरातले मुख्यमन्त्री र उपमुख्यमन्त्रीलाई पत्र लेखेर जेन्डेलाई ब्याटिङ गरेको भन्दै कारबाही गर्न माग गरेका छन् । थोरातले जेन्देले ड्युटीमा रहँदा गेम खेलेको आरोप लगाउँदै काममा लापरवाही गरेको आरोप लगाएका छन् ।
– एजेन्सी