कैलाश सिरोहियाको नागरिक्तामा यस्ता छन् ६ कैफियत, ३९६९८८८६ नम्बरको नागरिकता कस्को ?
![कैलाश सिरोहियाको नागरिक्तामा यस्ता छन् ६ कैफियत, ३९६९८८८६ नम्बरको नागरिकता कस्को ?](https://www.sheershakhabar.com/wp-content/uploads/2024/05/kailesh-sirohiya.jpg)
जनकपुर– प्रहरीले नागरिक्ता प्रकरणमा मंगलबार कान्तिपुर मिडिया ग्रुपका अध्यक्ष कैलाश सिरोहिया पक्राउ गरेको छ। सिरोहीयालाई स्थल मार्गबाट रातीनै धनुषा पुर्याईएको छ।
सिरोहिया विरुद्ध १६ वैशाखमा जिल्ला प्रहरी कार्यालय धनुषामै उजुरी परेको र जिल्ला अदालत धनुषाले नै पक्राउ पुर्जी जारी गरेकाले उनलाई धनुषा ल्याईएको हो।
प्रहरीले सिरोहियालाई पक्राउ गर्नु पर्ने ६ वटा कारण उल्लेख गर्दै विज्ञप्ति जारी गरेको छ। अनुसन्धान अधिकृत इन्स्पेक्टर नवराज खड्काले जारी गरेको विज्ञप्तिमा सिरोहियाको नागरिकतामा देखिएका कैफियतपूर्ण तथ्यहरू उल्लेख गरिएको छ।
यस्ता छन प्रहरी अनुशन्धानबाट खुलेका तथ्य
१) कैलाशप्रसाद रोहियाले जिल्ला प्रशासन कार्यालय, धनुषाबाट ३९६९८८८६ नम्बरको नेपाली नागरिकता प्रमाण पत्र लिएको तर उनले नागरिकता लिनुपूर्व नै त्यही नम्बरको नागरिकता शिवजी साहु तेलीको नाउँमा जारी भएको देखिएको।
२) जिल्ला प्रशासन कार्यालय, धनुषाको च.नं. १३२१३, मिति २०८१/०१/२० को पत्र अनुसार प्राप्त जवाफमा ०३३/३४ को बालिग रेकर्डमा विदेशी बाबुआमाबाट नेपाल अधिराज्यमा जन्म भएका नागरिकको नागरिकताहरूको दर्ता किताबमा नाम दर्ता रहेको देखिनुका साथै घासीराम मारवाडी (सिरोहिया) को सन्तानहरू गोपालप्रसाद सिरोहिया, गोविन्दप्रसाद सिरोहिया र पुनमकुमारी सिरोहियाको नागरिकता अंगीकृत नेपाली भएको र नाम प्रस्ट नभएको, कैलाशप्रसाद सिरोहियाको नागरिकता जन्मसिद्ध नेपाली रहेको देखिएको।
३) कैलाशप्रसाद सिरोहियाले विसं २०५७/०६/२९ मा नागरिकताको प्रतिलिपि लिँदा जिल्ला प्रशासन कार्यालयको धनुषाको रेकर्ड पुस्तिका (ढड्डा) मा फोटो सहितको अभिलेखमा अधिकार प्राप्त अधिकारीको दस्तखत गरेको नपाइएको, जन्म मितिको महलमा १८ वर्ष उमेर उल्लेख गरेको पाइएको उक्त रेकर्डमा जन्म मिति उल्लेख नरहेको।
४) सोही व्यहोराको निज व्यक्तिले प्राप्त गरेको नागरिकताको प्रतिलिपिमा जन्म मितिको महलमा १८ वर्ष र कोष्टमा जन्म मिति २०१९/०८/२९ समेत लेखेको पाइएको हुँदा जन्म मितिमा उल्लेखित अंकको आकृति, उक्त प्रतिलिपिमा उल्लेख भएका उमेर र अन्य अंकहरूको आकृतिसँग मेल नखाएको तथा फरक देखिएकोले पछि कोष्टमा जन्म मिति थपी किर्ते गरेको देखिएको।
५) कैलाशप्रसाद सिरोहियाले प्रथमपटक प्राप्त गरेको नागरिकता प्रमाणपत्रको जारी मितिको महलमा २०३६/०५/२५, जन्म मितिको महलमा १८ वर्ष उल्लेख गरेको पाइएको तर निजले २०५७/०६/२९ मा प्राप्त गरेको नागरिकताको पहिलो प्रतिलिपिमा जन्म मितिको महलमा १८ वर्ष, जन्म मिति २०१९/०८/२९ लेखेको पाइएकोले उमेर, जन्म मिति र नागरिकताको जारी मितिबीच उमेर हिसाब गर्दा १६ वर्ष ८ महिना हुन आएकाले उल्लेखित १८ वर्ष उमेर मेल नखाएको देखिएको।
६) कैलाशप्रसाद सिरोहियाले नागरिकता लिँदा पेस गर्नुपर्ने कागजातहरूको अभिलेख फेला नपरेको।