दमक– झापाको गौरादहका ७० वर्षीय एक वृद्ध फिल्म खेलेर हिरो बन्न खोज्दा जायजेथा गुमाएर सडकमा पुगेका छ। आफूलाई ‘हनी ट्रयाप’ मा पारेर सम्पत्ति कब्जा गरिएको भन्दै ती वृद्ध अहिले कानुनी उपचारमा छन्।

जानकारी अनुसार झापाको गौरादह–८, भुँडीसिमलका ७० वर्षीय पुलेन्द्रप्रसाद राजवंशीकी श्रीमती जल्पादेवी सेढाईं राजवंशीको करिब डेढ वर्षअघि निधन भयो। छोराछोरी नभएका पुलेन्द्र श्रीमतीको निधनसँगै एक्लो भए।

यसैक्रममा करिब २ महिनाअघि गौरादह नगरपालिकाका दमकल चालक ललित राजवंशीले पुलेन्द्र र गौरादहकै ३१ वर्षीया गंगादेवी कोचबीच चिनजान गराए। ललितले नै सञ्चालन गर्दै आएको होटलमा काम गर्दै आएकी आएकी गंगा र पुलेन्द्रको सम्वन्ध झांगिदै गयो। गंगाका ९ र १४ वर्षका दुई छोरी छन्।

यही दुई महिनाको बीचमा ललितले ‘देउनियार कि गति’ नामको फिल्म बनाउने प्रश्ताव गरे। फिल्ममा पुलेन्द्र र गंगाले अभिनय गर्ने भए। फिल्ममा विवाहको एउटा दृष्य पनि थियो। विवाहका लागि आवश्यक लत्ताकपडा, गाडी, खाजालगायतका लागि पैसाको समस्या पर्यो। त्यसका लागि पुलेन्द्रले नै करिव डेढ लाख खर्च खर्च गरे। निर्धारित समय अनुसार २२ जेठमा कनकाईको कोटिहोममा पुलेन्द्र बेहुला र गंगा बेहुली बनेर विवाह (सुटिङ) गरे।

फिल्मको यही दृष्य अहिले पुलेन्द्र घरबाट सडकमा पुग्ने कारण बनेको छ। त्यही फिल्मको भिडिओ देखाएर पछिल्लो समय ललित र गंगाले आफुलाई वार्गेनिङ गर्न थालेको पुलेन्द्रले बताएका छन्। भीडीओमा पुलेन्द्र र गंगाको विवाह भएको पनि देखिन्छ। जुन भीडीओमा ललितले कमेन्ट्री गरेका छन्।

उनका अनुसार फिल्मको सुटिङ सकिएदेखि नै ललित र गंगाले ५ लाख रुपैयाँका लागि बार्गेनिङ गरेका थिए। तर, उनीहरुले मागे अनुसारको रकम नदिँदा अहिले गंगाले आफनो घरजग्गा कब्जा गरेको पुलेन्द्रले बताएका छन्।

१० दिनअघि उपचार गराउन आफु धरान गएका बेला गंगाले आफनो घरजग्गा कब्जा गरेको उनको भनाई छ। उनी अहिले घरबारविहीन भएका छन्। जायजेथा भएर पनि सडकको बास भएपछि उनले घरजग्गा कब्जार जायजेथा लुटपाट गरेको आरोपमा झापा जिल्ला अदालतमा मुद्दा दायर गरेका छन्।

गंगादेवी भने सम्पर्कमा छैनन्। उनको ९८१७९५१७३४ को मोवाईल नम्बरमा फोन गर्दा रिङ गएपछि रिसिभ हुँदैन।