विराटनगर– पतिको रिसले आफ्नै २ नाबालिका छोरीको हत्या गरेकी मोरङको सुन्दरहरैँचा– ७, बेलगाछीकी २१ वर्षीया अस्मिता पौडेल (कार्की) मानसिक रुपमा पुर्ण स्वस्थ रहेको खुलेको छ। स्वास्थ्य परिक्षण गर्दा उनले विष सेवन गरेको पनि पुष्टि भएको छैन।

पतिले दिएको ‘टर्चर’ सहन नसकेर आत्महत्या गर्न आफुले विष सेवन गरेको र पछि छोरीहरुलाई पनि विष खुवाएको उनले वताउँदै आएकी छिन्। लामो समयदेखि पतिले तनाव दिँदै आएकाले आफू पनि मर्ने र छोरीहरुलाई पनि मार्ने योजना अनुसार घटना गराए पनि आफु भने बाँचेको उनको भनाई छ।

विष सेवनका कारण उनका छोरीहरु १ वर्षीया आइका र ३ वर्षीया अर्पणा कार्कीको मृत्यु भएको हो। १५ भदौंको दिउँसो करिव साढे ४ बजे स्थानीय नारायण न्यौपानेको केरा बगानमा बालिकाको शव फेला परेको थियो। आत्महत्या गरिसकेको आशंकाका बीच घट्नाको ५ दिनपछि अश्मिता भने झापाको विर्तामोड नगरपालिका–५ स्थित पूर्व–पश्चिम राजमार्गमा (एभरेष्ट बैंक अगाडि) जिवितै फेला परेकी थिईन। छोरीहरु मृत फेला परेको करिव १ घण्टापछि उनले गोठगाउँको मालती होटलमा मःमः खाएर हिडेको पाईएको थियो।

यसरी, आफ्नै २ छोरीको हत्या गरेर आफु फरार हुने र त्यस्तो अवस्थामा पनि मःमः खाएर हिड्न सक्ने क्षमता एउटी आमालाई कसरी आयो ? भन्ने विषयमा धेरैले चासो ब्यक्त गरेका थिए। अधिकांशले घट्नालाई अशमान्य रुपमा लिँदै उनको मानसिक स्वास्थ्यका विषयमा चासो ब्यक्त गरेका थिए। उनी स्वयमले छोरीको हत्या गरेको स्विकार गरिसकेपछि उनलाई कारवाही भन्दा पनि उपचारको खाँचो रहेको धेरैले अनुमान लगाए।

त्यसपछि प्रहरीले विराटनगर स्थित कोशी अस्पतालमा उनको उपचार तथा स्वास्थ्य परीक्षण गराएको थियो। तर, उनलाई मानसिक समस्या नरहेको र विगतमा पनि मानसिक समस्याको औषधि सेवन नगरेको देखिएको मोरङ प्रहरीका एसपी नवराज कार्कीले वताएका छन्।

‘कल्पना गर्नै नसकिने र सुन्दै शरीर सिरिङ्ग हुने घटना एउटी आमाबाट कसरी सम्भव भयो ? भनेर हामी खोजी गर्दैछौं’ उनले भने–‘त्यही सिलसिलामा उनको मानसिक स्वास्थ्य पनि परिक्षण गरियो। मानसिक अवस्था ठीक रहेछ, समस्या देखिएन’ उनले भने।

अश्मिताले दावी गरे अनुसार विष सेवन गरे/नगरेको पनि यकिन नभएको एसपी कार्कीको भनाई छ। ‘मानिसको शरीरमा विष सेवनको असर ७२ घण्टा भित्रमा देखिँदो रहेछ’ उनले भने–‘उनी फेला पर्दा ५ दिन बितिसकेको थियो। परीक्षण गराउँदा विष सेवन गरे/नगरेको छुट्टिएन।’ थोरै सेवन गरेकाले असर नपरेको वा विष सेवन नै नगरेको पनि हुन सक्ने प्रहरीको अनुमान छ।

प्रहरीको हालसम्मको अनुशन्धानले पति ३१ वर्षीय अर्जुन कार्कीसँग रिस उठ्दा अस्मिताले विष खुवाएर छोरीहरुको हत्या गरेको देखिएको छ। पोष्टमार्टमको रिपोर्ट भने आउन वाँकी छ।

प्रहरीका अनुसार धनकुटाको पाख्रिबास नगरपालिका–५ घर भएका अर्जुन र अश्मिता २ छोरीसहित गत वैशाखदेखि सुन्दरहरैंचा–७ स्थित दिदी सीता रेग्मीको घरमा डेरा लिएर बसेका थिए। अर्जुनले दिदीको घर नजिकै आफ्नै घर बनाउँदै छन्। उनी पेशाले सवारी चालक हुन। उनको इटहरी–भोजपुर चल्ने आफ्नै ट्याक्सी छ।

ट्याक्सी लिएर भोजपुर गएका उनी ३ दिनपछि १४ भदौमा फर्किएका थिए। निर्माणाधीन घरमा पानी नलगाएको विषयमा पत्नीसँग साँझ वादविवाद भयो। त्यसलगत्तै करिव ८ बजे दुवै छोरी टिपेर अस्मिता घर छोडेर हिँडिन्। अबेरसम्म नफर्किएपछि छरछिमेकीको सहयोग लिएर अर्जुनले खोजी गर्न थाले।

खोजतलास गर्दा पनि फेला नपरेपछि १५ भदौको बिहान उनले प्रहरी चौकी गछियामा घटनाको बारेमा जानकारी गराए। दिनभरी अश्मिता र छोरीहरुको खोजी भयो। त्यसै क्रममा सोही दिन दिउँसो दुई छोरीहरु केराघारीमा मृत अवस्थामा फेला परेका थिए।

१५ वर्षमा विहे, २१ वर्षमा दुई छोरीको हत्या गरी प्रहरी हिरासतमा
संखुवासभाको मुढेशनिश्चरे माइती भएकी १५ वर्षीया अस्मिताले कक्षा ९ मा पढ्दा पढ्दै ९ फागुन ०७५ मा अर्जुनसँग भागेर विवाह गरेकी थिईन। शिक्षक रहेका अश्मिताका मामा उत्तरकुमार खड्काका अनुसार उनीहरुको बीचमा सम्बन्ध नराम्रो भएको पनि थाहा थिएन। छरछिमेकी र आफन्तले राम्रै भन्थे।

अस्मिता उत्तरकुमारकी काइँली दिदीकी माहिली छोरी हुन्। उनका अनुसार सानैमा भागेर बिहे गरेपनि माइतीमा सम्बन्ध राम्रो थियो। नियमित आउजाउ चलिरहेको थियो। उनले कहिलै पनि माइतीमा सम्बन्धमा खटपट भएको सुनाएकी थिईनन्।

‘ज्वाईंले नराम्रो गरेको कुरा भान्जीले गरेको थाहा छैन’ उनी भन्छन्–‘दुवै जना मिलेर राम्रैसँग गरिखाँदै गरेको सुनेको थिएँ। यस्तो देख्नु पर्यो।’ अस्मितालाई मानसिक समस्या भएको पनि आफुलाई जानकारी नभएको उनको भनाई छ। अस्मिताले अहिले पनि प्रहरीको नियन्त्रणमा उपचाररत छिन्। प्रहरीले घटनाको थप अनुशन्धान गरिहेको छ।