काठमाडौँ — नेपाली कम्युनिस्ट पार्टी (नेकपा) ले फागुन २१ मा हुने प्रतिनिधिसभा सदस्य निर्वाचनका लागि बर्दिया क्षेत्र नम्बर १ बाट विष्णुप्रसाद चौधरीलाई उम्मेदवार बनाएको छ। सोमबार पार्टी संयोजक पुष्पकमल दाहाल ‘प्रचण्ड’ले चौधरीलाई टिकट थमाएका हुन्।

यससँगै लामो समयदेखि सोही क्षेत्रमा उम्मेदवारीको चर्चा चलाइएका वरिष्ठ नेता बामदेव गौतम यसपटक चुनावी दौडबाट बाहिरिएका छन्। बर्दिया–१ मा यसअघि गौतमको पुनरागमन हुने अनुमान गरिँदै आएको थियो। २०७४ को निर्वाचनमा यही क्षेत्रबाट पराजित भएका गौतम त्यसपछि राष्ट्रिय सभा सदस्य बनेका थिए।

पछिल्लो समय उनले फेरि प्रतिनिधिसभा चुनाव लड्ने तयारी गरिरहेको संकेत दिएका थिए। यही आशमा उनले आइतबार राष्ट्रिय सभा सदस्य पदबाट राजीनामा पनि दिएका थिए, यद्यपि उनको कार्यकाल माघ १० गतेदेखि नै सकिँदै थियो र माघ ११ गते राष्ट्रिय सभाको निर्वाचन तय भइसकेको छ।

तर उम्मेदवार छनोटको अन्तिम निर्णयमा गौतमको नाम सूचीमा परेन। यसबारे प्रतिक्रिया दिँदै गौतमले आफूलाई योजनाबद्ध रूपमा चुनावबाट बाहिर राखिएको संकेत गरेका छन्। ‘म उठ्दिन भनेपछि सकियो,’ उनले भने, ‘उठ्दिनँ भन्ने वातावरण बनाइयो।’ उनका शब्दले पार्टीभित्रको असन्तुष्टि र आन्तरिक तानातानलाई झल्काउँछ।

पार्टी स्रोतका अनुसार नेकपाले बर्दियाका दुवै निर्वाचन क्षेत्रमा पहाडी मूलका उम्मेदवार अघि सार्ने निर्णय गरेपछि गौतम असन्तुष्ट बनेका थिए। यही कारण उनले बर्दिया–१ बाट उम्मेदवारी नदिने निष्कर्षमा पुगेको बताएका छन्। यद्यपि पार्टी नेतृत्वले भने चौधरीको उम्मेदवारीलाई क्षेत्रीय सन्तुलन र संगठनात्मक रणनीतिको हिस्सा भएको बताउँदै आएको छ।

यसैबीच, नेकपाका अर्का वरिष्ठ नेता तथा पूर्वप्रधानमन्त्री झलनाथ खनालले पनि यो निर्वाचन नलड्ने घोषणा गरिसकेका छन्। खनाल र गौतम दुवैको अनुपस्थितिले नेकपाभित्र पुस्तान्तरण र नेतृत्व व्यवस्थापनको बहसलाई थप चर्काएको छ।

बर्दिया–१ मा विष्णुप्रसाद चौधरीको उम्मेदवारीसँगै नेकपाले नयाँ अनुहारलाई अघि सार्दै संगठन सुदृढीकरणको सन्देश दिन खोजेको देखिन्छ। तर टिकट नपाएर गौतमजस्ता वरिष्ठ नेता असन्तुष्ट रहनु भने पार्टीभित्रको आन्तरिक समीकरण र आगामी दिनको राजनीति कति सहज रहन्छ भन्ने प्रश्नलाई खुलै राखेर गएको छ।