बारा– संघीय सरकारको बजेटमा निर्माण भएको स्वास्थ्य चौकी उद्घाटन गर्ने विषयमा विवाद चर्किएपछि बाराको फेटा गाउँपालिकामा प्रहरीले गोली चलाएको छ। शनिबार बिहान आयोजित उदघाटन कार्यक्रमस्थलमै दुई पक्षबीच झडप भएपछि प्रहरीले भीड नियन्त्रण गर्न बल प्रयोग गरेको हो।

फेटा गाउँपालिका–३ स्थित स्वास्थ्य चौकी उदघाटनका लागि गाउँपालिका अध्यक्ष रुस्तम अन्सारीसहितको टोली पुगेको थियो। तर अध्यक्ष अन्सारीको विपक्षमा रहेका स्थानीयले कार्यक्रमको विरोध गर्दै उदघाटन रोक्न खोजेपछि विवाद सुरु भएको थियो।

विवादकै क्रममा स्वास्थ्य चौकी परिसरमा राखिएको शिलालेखसमेत तोडफोड भएको थियो। त्यसपछि अध्यक्ष अन्सारी पक्षधर र विरोधमा रहेका स्थानीयबीच भनाभन हुँदै विवादले झडपको रूप लिएको थियो।

स्थिति तनावग्रस्त बनेपछि प्रहरीले सुरुमा लाठीचार्ज गरेको मधेस प्रदेश प्रहरी प्रमुख डीआईजी ओमप्रसाद अधिकारीले बताएका छन्। प्रहरीमाथि ढुंगामुढा हुन थालेपछि भीड नियन्त्रणका लागि प्रहरीले गोली चलाएको उनको भनाइ छ।

डीआईजी अधिकारीका अनुसार प्रहरीले हवाई फायर गरेको थियो। तर घटनामा एक युवक गोली लागेर घाइते भएका छन्। घाइते युवकको पहिचान खुल्न सकेको छैन। उनलाई उपचारका लागि वीरगन्जस्थित नेशनल मेडिकल कलेज लगिएको प्रहरीले जनाएको छ।

प्रहरीका अनुसार युवकलाई लागेको गोली कसको हतियारबाट चलेको हो भन्ने खुलेको छैन। प्रहरीले गोली चलाएको घटनाबारे औपचारिक विवरण सार्वजनिक गरिसकेको छैन।

घटनापछि स्वास्थ्य चौकी उदघाटन कार्यक्रम प्रभावित भएको छ। संघीय सरकारको बजेटमा बनेको स्वास्थ्य चौकी उदघाटनको विषय किन विवादित बन्यो, शिलालेख तोडफोडको अवस्था कसरी सिर्जना भयो र विरोधमा उत्रिएका स्थानीयका माग के थिए भन्ने विषयमा विस्तृत विवरण आउन बाँकी छ।

उदघाटन कार्यक्रमस्थलमै प्रहरीको गोली लागेर युवक घाइते भएपछि भीड नियन्त्रणका क्रममा प्रहरीले अपनाएको बल प्रयोगको प्रक्रिया र गोली लागेर घाइते भएका व्यक्तिबारे पनि थप छानबिन आवश्यक देखिएको छ।