काठमाडौँ– साविक विजेता लुम्बिनी लायन्सको नेपाल प्रिमियर लिग (एनपीएल) मा कायम अपराजित यात्रामा काठमाडौं गोर्खाजले पूर्णविराम लगाएको छ। जहानदाद खानको घातक बलिङ र डेभिड वार्नरको अर्धशतकीय इनिङ्सको मद्दतमा काठमाडौंले शनिबार लुम्बिनीलाई ३६ रनले पराजित गरेको हो।

त्रिवि क्रिकेट मैदान कीर्तिपुरमा काठमाडौंले दिएको १६१ रनको लक्ष्य पछ्याएको लुम्बिनी १९.३ ओभरमा १२४ रनमै अलआउट भयो। प्रतियोगितामा लगातार अपराजित रहँदै आएको लुम्बिनीले यसपटक काठमाडौंको बलिङ आक्रमणसामु आफ्नो ब्याटिङ क्षमता देखाउन सकेन।

लुम्बिनीको हारको आधार खेलको सुरुवातमै तयार भएको थियो। पहिलो ६ ओभर अर्थात् पावरप्ले नसकिँदै टोलीले ६ विकेट गुमाइसकेको थियो। २८ रनमै ६ विकेट गुमाएको लुम्बिनी सुरुदेखि नै गम्भीर दबाबमा परेको थियो। पावरप्ले समाप्त हुँदा उसको स्कोर ६ विकेटको क्षतिमा ३४ रन मात्रै थियो।

काठमाडौंका पाकिस्तानी बलर जहानदाद खानले सुरुवातदेखि नै लुम्बिनीका ब्याटरलाई टिक्न दिएनन्। उनले आफ्नो चार ओभरमा २३ रन खर्चेर चार विकेट लिए। कप्तान करण केसीले पनि २४ रन दिएर दुई विकेट झारेपछि लुम्बिनीको शीर्ष क्रम धराशायी बन्यो।

लुम्बिनीका ओपनर डार्सी सर्ट चार रन र आशिफ शेख एक रनमै आउट भए। निरोसन डिक्वेलाले सात बलमा १४ रन बनाए पनि लामो समय टिक्न सकेनन्। कप्तान रोहितकुमार पौडेल खाता नखोली पेभेलियन फर्किए। दिलीप नाथ र ग्रान्ट स्टेवार्ट पनि सस्तैमा आउट भएपछि लुम्बिनीले खेलमा फर्किने आधार नै गुमायो।

जोराको संघर्षले जोगाउन सकेन लुम्बिनी
शीर्ष क्रम ध्वस्त भएपछि सन्दीप जोराले एक छेउबाट इनिङ्स सम्हाल्ने प्रयास गरे। उनले ४५ बलमा तीन चौकासहित ४४ रन बनाए। तर, अर्को छेउबाट उनलाई पर्याप्त साथ मिलेन।

रुबेन ट्रम्पलमेनले ११ र अभिषेक गौतमले १६ रन बनाए। शेर मल्लले १५ बलमा १२ रन जोडे। आठौं विकेटका लागि जोराले अभिषेकसँग ४६ रनको साझेदारी गर्दै लुम्बिनीलाई केही आशा दिलाएका थिए।

तर १४.४ ओभरमा अभिषेक आउट भएपछि लुम्बिनीको सम्भावना फेरि कमजोर बन्यो। जोराले व्यक्तिगत रूपमा संघर्ष जारी राखे पनि १७.४ ओभरमा उनी ४४ रन बनाएर आउट भए। त्यसबेला टोलीको स्कोर ९५ रन मात्रै थियो। बाँकी ब्याटरले उल्लेख्य योगदान दिन नसक्दा लुम्बिनी १९.३ ओभरमै १२४ रनमा समेटियो।

काठमाडौंका लागि जहानदाद खान चार विकेटसहित सर्वाधिक सफल बलर बने। करण केसीले दुई विकेट लिए। शहाब आलम, सन्तोष यादव, राशिद खान र शेहान अराचिगेले समान एक विकेट हात पारे।

वार्नरको अर्धशतकले काठमाडौंलाई बलियो आधार
यसअघि टस हारेर पहिले ब्याटिङ गरेको काठमाडौं गोर्खाजले निर्धारित २० ओभरमा आठ विकेट गुमाएर १६० रन बनाएको थियो।

काठमाडौंको इनिङ्सलाई ओपनर डेभिड वार्नर र साहिल पटेलले बलियो सुरुवात दिलाएका थिए। उनीहरूले पहिलो विकेटका लागि १३.१ ओभरमा १०४ रनको साझेदारी गरे। साहिलले ३६ बलमा दुई चौका र दुई छक्कासहित ३८ रन बनाए भने वार्नरले ५० बलमा नौ चौका र एक छक्काको मद्दतमा ६६ रन जोडे।

यी दुईको साझेदारीले काठमाडौंलाई ठूलो योगफलतर्फ अघि बढाएको थियो। तर, पहिलो विकेटको साझेदारी टुटेपछि काठमाडौंको ब्याटिङ लय केही खस्कियो। वार्नर ६६ रनमा आउट भए। त्यसपछि कप्तान करण केसी नौ रन र विल बोसिस्टो शून्यमै पेभेलियन फर्किए।

लगातार विकेट गुमाउँदा एक समय बलियो अवस्थामा रहेको काठमाडौं दबाबमा परेको थियो। अन्तिम पाँच ओभरमा सात विकेट गुमाउँदै ४६ रन मात्रै जोड्न सक्यो। तर, शेहान अराचिगेले आक्रामक ब्याटिङ गर्दै टोलीको स्कोर १६० पुर्‍याए। उनले १५ बलमा तीन चौका र दुई छक्कासहित अविजित ३४ रन बनाए।

लुम्बिनीका लागि अभिषेक गौतम, शेर मल्ल र रुबेन ट्रम्पलमेनले समान दुई विकेट लिए। तर, आफ्नै ब्याटिङ कमजोर हुँदा उनीहरूको बलिङ प्रदर्शन जितका लागि पर्याप्त हुन सकेन।

काठमाडौंको लय फर्कियो, लुम्बिनीको अपराजित यात्रा टुंगियो
यो जितसँगै काठमाडौं गोर्खाजले प्रतियोगितामा आफ्नो स्थिति बलियो बनाएको छ। पहिलो खेलमा जनकपुर बोल्ट्ससँग आठ विकेटले पराजित भएको काठमाडौंले त्यसपछि कर्णाली याक्सलाई चार विकेट र विराटनगर किंग्सलाई नौ विकेटले हराएको थियो। लुम्बिनीविरुद्धको जित उसको लगातार तेस्रो सफलता हो।

अर्कोतर्फ, लुम्बिनीले यसअघि सुदूरपश्चिम रोयल्सलाई सात विकेट, पोखरा एभेन्जर्सलाई आठ विकेट र जनकपुर बोल्ट्सलाई १६ रनले पराजित गरेको थियो। दोस्रो खेल वर्षाका कारण प्रभावित हुँदा उसले एक अंक पाएको थियो।

अघिल्लो संस्करणको समूह चरणका अन्तिम तीन खेल र फाइनल जितेको लुम्बिनीले यस संस्करणका सुरुवाती चार खेलमा पनि हार बेहोरेको थिएन। यसरी लगातार १० खेलसम्म अपराजित रहेको साविक विजेताको यात्रामा काठमाडौंले रोक लगाएको हो।

प्रतियोगितामा उपाधि दाबेदारका रूपमा हेरिएको लुम्बिनीका लागि यो हार ब्याटिङ सुधार्नुपर्ने स्पष्ट संकेत बनेको छ। विशेषगरी शीर्ष क्रमको कमजोर प्रदर्शन र सुरुवाती ओभरमै विकेट गुमाउने समस्याले टोलीलाई ठूलो चुनौती दिएको छ। अर्कोतर्फ, वार्नरको अनुभव र जहानदादको घातक बलिङले काठमाडौंलाई महत्वपूर्ण जित दिलाएको छ।