सामान्य विवादमा मध्यराति श्रीमानको घातक प्रहार, लोहोरोले हानेर ४० वर्षीया श्रीमतीको हत्या

सिन्धुली– सिन्धुलीको कमलामाई नगरपालिका–१० डाँडाटोलमा श्रीमानले ढुंगाको लोहोरोले टाउकोमा प्रहार गर्दा ४० वर्षीया महिलाको मृत्यु भएको छ। सामान्य घरायसी विवादका क्रममा ४२ वर्षीय मनोज कार्कीले आफ्नै श्रीमती सानुकुमारी कार्कीको हत्या गरेको प्रहरीले जनाएको छ।

प्रहरीका अनुसार मंगलबार राति करिब १ बजे मनोज र सानुकुमारीबीच विवाद भएको थियो। विवाद चर्किएपछि मनोजले ढुंगाको लोहोरो उठाएर सानुकुमारीको टाउकोमा प्रहार गरेका थिए। टाउकोमा गम्भीर चोट लागेकी सानुकुमारीको घटनास्थलमै मृत्यु भएको थियो।

घटनाको जानकारी पाएलगत्तै इलाका प्रहरी कार्यालय भिमान र जिल्ला प्रहरी कार्यालय सिन्धुलीबाट प्रहरी टोली घटनास्थल पुगेको थियो। प्रहरीले घटनामा संलग्न रहेको आरोपमा मनोजलाई नियन्त्रणमा लिएको छ।

प्रहरीले घटनास्थलको अवस्था र प्रारम्भिक विवरण संकलन गरी घटनाबारे थप अनुसन्धान अघि बढाएको जनाएको छ। हत्या हुनुको वास्तविक कारण, विवादको पृष्ठभूमि र घटनासँग सम्बन्धित अन्य पक्षबारे अनुसन्धान भइरहेको छ।

सामान्य घरायसी विवादले हिंसात्मक रूप लिँदा एक महिलाको ज्यान गएको यो घटनाले घरेलु हिंसा र परिवारभित्रै हुने हिंसाको भयावह पक्ष फेरि उजागर गरेको छ। प्रहरीले अनुसन्धान पूरा भएपछि घटनाबारे थप विवरण सार्वजनिक गर्ने जनाएको छ।


प्रतिक्रिया

Leave a Reply

Your email address will not be published. Required fields are marked *

लोकप्रिय

ताजा अपडेट