गृहमन्त्रीकी आमाको भिडियो प्रकरणमा एक व्यक्ति पक्राउ, भिडियो पहिलोपटक पोस्ट गर्ने पत्रकार नै सम्पर्कविहीन !

काठमाडौँ– गृहमन्त्री सुधन गुरुङकी आमा ज्ञानु लामाको भिडियो सामाजिक सञ्जालमा सार्वजनिक गरेको प्रकरणले नयाँ मोड लिएको छ। महिलाको अनुमतिबिना भिडियो खिचेर सार्वजनिक गरेको आरोपमा प्रहरीले एक जनालाई पक्राउ गरेको छ भने उक्त भिडियो पहिलोपटक सार्वजनिक गरेको भनिएका चलचित्र पत्रकार शालिकराम न्यौपाने नै रहस्यमय रूपमा सम्पर्कविहीन भएका छन्।

गृहमन्त्रीकी आमाको भिडियो सार्वजनिक गरेको आरोपमा कालिकोट घर भई भक्तपुर बस्दै आएका छत्र बोगटी पक्राउ परेका हुन्। जिल्ला प्रहरी परिसर काठमाडौंका प्रहरी उपरीक्षक तथा प्रवक्ता दानबहादुर थापाका अनुसार उनलाई मंगलबार भक्तपुरबाट पक्राउ गरिएको हो।

४९ वर्षीया ज्ञानु लामाले आफ्नो अनुमतिबिना भिडियो खिचेर सामाजिक सञ्जालमा सार्वजनिक गरिएको भन्दै प्रहरीमा उजुरी दिएपछि बोगटी पक्राउ परेका हुन्। उनीविरुद्ध वैयक्तिक गोपनीयतासम्बन्धी कसुरमा अनुसन्धान गर्न काठमाडौं जिल्ला अदालतबाट पाँच दिनको म्याद लिइएको प्रहरीले जनाएको छ।

तर, यही भिडियो प्रकरणसँग जोडिएको अर्को घटनाले थप प्रश्न खडा गरेको छ। चलचित्र पत्रकार संघका केन्द्रीय सदस्य शालिकराम न्यौपाने मंसिर १ गते बिहानदेखि परिवारको सम्पर्कमा छैनन्। उनकी श्रीमती अस्मिता पाण्डेले श्रीमानको खोजतलास गरिदिन माग गर्दै अनामनगर प्रहरी वृत्तमा निवेदन दिएकी छिन्।

भिडियो पहिलोपटक पोस्ट गर्ने पत्रकार नै बेपत्ता
अस्मिताका अनुसार शालिकरामले ‘इन्टरटेनमेन्ट रिल्स’ नामक फेसबुक पेजबाट गृहमन्त्री गुरुङकी आमा ज्ञानु लामाको भिडियो पहिलोपटक सार्वजनिक गरेका थिए। भिडियो भाइरल भएपछि साथीभाइ तथा विभिन्न व्यक्तिले फोन गरेर हटाउन दबाब दिएको उनको दाबी छ।

उनका अनुसार दबाबपछि शालिकरामले उक्त भिडियो हटाएका थिए। अहिले सोही फेसबुक पेजको नाम परिवर्तन गरी ‘न्युज अपडेट एनपी’ राखिएको छ र भिडियो पनि त्यहाँ देखिँदैन। अस्मिताले श्रीमान् सम्पर्कविहीन हुनुअघि मंसिर १ गते बिहान ९ बजेतिर ह्वाट्सएपमा व्यक्तिगत भ्वाइस म्यासेज पठाएको बताएकी छिन्। त्यसपछि भने उनीसँग सम्पर्क हुन नसकेको उनको भनाइ छ।

‘उहाँले भिडियो हालेपछि धेरैले डिलेट गर्न दबाब दिनुभएको थियो। त्यसपछि उहाँले डिलेट पनि गर्नुभएको थियो। हिजो बिहान ९ बजे मलाई ह्वाट्सएपमा पर्सनल भ्वाइस म्यासेज पठाउनुभएको छ। त्यसपछि उहाँ सम्पर्कविहीन हुनुहुन्छ,’ अस्मिताले बताएकी छिन्।

उनका अनुसार मंसिर १ गते बिहान ११ बजेदेखि शालिकराम सम्पर्कविहीन भएका हुन्। पटकपटक फोन गर्दा फोन जाने तर नउठ्ने भएपछि उनी बस्दै आएको मध्यबानेश्वरस्थित कोठामा पुगेर खोजी गरिएको थियो। कोठामा ताला लागेको र भित्रका सामान यथास्थितिमै रहेको अस्मिताले प्रहरीमा दिएको निवेदनमा उल्लेख गरेकी छिन्।

श्रीमानको खोजीका लागि दिएको निवेदन प्रहरी वृत्त अनामनगरमा दर्ता भइसकेको र खोजतलास सुरु गरिएको प्रहरी स्रोतले जनाएको छ।

भिडियोमा के भनेकी थिइन् ज्ञानु लामाले ?
सामाजिक सञ्जालमा भाइरल भएको भिडियोमा ज्ञानु लामाले आफू गृहमन्त्री सुधन गुरुङकी आमा भएको बताएकी थिइन्। लामो समयदेखि घरपरिवारबाट अलग रहेर धार्मिक जीवन बिताउँदै आएको बताउने उनले छोरासँगको सम्बन्ध र आफ्नो जीवनशैलीबारे कुराकानी गरेकी छिन्।

भिडियोमा उनले आफ्ना दुई छोरी र एक छोरा रहेको बताएकी छिन्। छोरा गृहमन्त्री बनेपछि भेट नभएको र कहिलेकाहीँ काम पर्दा फोन गर्ने गरेको उनको भनाइ थियो।

छोराछोरीले आर्थिक सहयोग गर्छन् कि गर्दैनन् भन्ने प्रश्नमा उनले आफूलाई अहिले उनीहरूको सहयोग आवश्यक नरहेको बताएकी थिइन्। आफू शारीरिक रूपमा सक्षम रहेको उल्लेख गर्दै उनले आपत् परे मात्रै छोराछोरीले सहयोग गर्ने अपेक्षा राखेको आशय व्यक्त गरेकी थिइन्।

विभिन्न आश्रममा बसेको बताएकी उनले आफू सडकमा मागेर खानुपर्ने अवस्थामा नरहेको पनि स्पष्ट पारेकी थिइन्। छोरालाई भेट्न किन नगएको भन्ने प्रश्नमा आफ्नो व्यवस्था मिलिसकेपछि भेट्न बोलाउने बताएकी थिइन्।

भिडियो सार्वजनिक भएपछि लामाले अर्को भिडियोमार्फत आफूले अन्तर्वार्ता दिन अनुमति नदिएको र अनौपचारिक कुराकानीलाई लुकेर खिचेर सार्वजनिक गरिएको आरोप लगाएकी थिइन्। आफ्नो अनुमतिबिना भिडियो सार्वजनिक गर्नेहरूमाथि कारबाही हुनुपर्ने उनको माग थियो।

गोपनीयताको उजुरीपछि पक्राउ, पत्रकारको खोजी जारी
लामाले आफ्नो अनुमतिबिना भिडियो खिचेर सार्वजनिक गरिएको भन्दै उजुरी दिएपछि प्रहरीले बोगटीलाई पक्राउ गरेको हो। उनीमाथि वैयक्तिक गोपनीयतासम्बन्धी कसुरमा अनुसन्धान भइरहेको छ।

अर्कोतर्फ, भिडियो पहिलोपटक सार्वजनिक गरेको दाबी गरिएका पत्रकार न्यौपानेको अवस्था अझै स्पष्ट भएको छैन। भिडियो हटाउन दबाब आएको र त्यसपछि श्रीमान् सम्पर्कविहीन भएको अस्मिताको भनाइ छ। तर उनलाई कसले, किन र कुन उद्देश्यले दबाब दिएको थियो भन्ने विषय स्वतन्त्र रूपमा पुष्टि भएको छैन।

छत्र बोगटीको पक्राउ र शालिकराम न्यौपानेको बेपत्ता अवस्थालाई एउटै घटनाको प्रमाणित परिणामका रूपमा जोड्न मिल्ने आधार अहिलेसम्म सार्वजनिक भएको छैन। दुवै घटनाको अनुसन्धानबाट मात्रै वास्तविकता खुल्न सक्छ।

एउटातर्फ महिलाको व्यक्तिगत गोपनीयताको अधिकार उल्लंघन भएको उजुरीमा पक्राउ र अनुसन्धान अघि बढेको छ भने अर्कोतर्फ भिडियो सार्वजनिक गर्ने भनिएका पत्रकारको खोजी भइरहेको छ। त्यसैले यस प्रकरणमा गोपनीयताको हकको संरक्षणसँगै सम्पर्कविहीन पत्रकारको अवस्थाबारे तत्काल स्पष्ट जानकारी सार्वजनिक हुनु पनि उत्तिकै आवश्यक देखिएको छ।


प्रतिक्रिया

Leave a Reply

Your email address will not be published. Required fields are marked *

लोकप्रिय

ताजा अपडेट