काठमाडौँ– सरकारले पूर्वसभामुख दमननाथ ढुंगानाको निधनमा आज सार्वजनिक (शोक) बिदा दिने निर्णय गरेको छ। आज बसेको मन्त्रिपरिषद बैठकले यस्तो निर्णय गरेको हो।

सरकारका प्रवक्ता एवम् सूचना तथा सञ्चार प्रविधिमन्त्री पृथ्वीसुब्बा गुरुङले आज सार्वजनिक बिदा दिने निर्णय गरेको जानकारी दिए। ढुंगानाको आइतबार दिउँसो उपचारको क्रममा अस्पतालमा निधन भएको थियो।

ढुंगानाको आज राष्ट्रिय सम्मानका साथ पशुपति आर्यघाटमा अन्त्येष्टि गरिँदै छ। ढुंगानाको निधनको शोकमा आज स्वदेश र विदेशस्थित सबै सरकारी कार्यालयमा राष्ट्रिय झण्डा आधा झुकाइने छ।

अन्त्येष्टिअघि सानो गौचरणमा बिहान साढे ११ बजे हुने श्रद्धाञ्जली सभामा प्रधानमन्त्री केपी शर्मा ओली पनि सहभागी हुँदैछन्। वरिष्ठ अधिवक्ता ढुंगाना २०४८ सालदेखि २०५१ सालसम्म सभामुख बनेका थिए । उनी सरकार–माओवादी शान्तिवार्ताका सहजकर्तासमेत थिए।