राजविराज— गृह मन्त्रालयले ३२ जना राजपत्रांकित प्रथम र द्वितीय श्रेणीका कर्मचारीको सरुवा तथा पदस्थापन गर्दा मधेश र कोशी प्रदेशका जिल्ला प्रशासन तथा इलाका प्रशासन कार्यालयमा पनि फेरबदल गरेको छ।

मन्त्रालयको असोज १५ र २३ गतेको निर्णयअनुसार सिरहा, महोत्तरी, बारा, मोरङ र झापासहितका जिल्लामा प्रशासनिक जिम्मेवारी हेरफेर गरिएको हो। सरुवा सूचीमा कारागार प्रशासनका अधिकारीसमेत छन्।

मन्त्रालयको सूचीअनुसार, झापाको इलाका प्रशासन कार्यालय दमकमा कार्यरत उपसचिव विश्वराज नेपाललाई सिरहाको सहायक सीडीओमा सरुवा गरिएको छ। झापाकै जिल्ला प्रशासन कार्यालयमा कार्यरत सहायक सीडीओ सुशील पोखरेललाई महोत्तरीको बर्दिबासस्थित इलाका प्रशासन कार्यालयमा उपसचिवका रूपमा सरुवा गरिएको छ।

महोत्तरीको जिल्ला प्रशासन कार्यालयमा कार्यरत सहायक सीडीओलाई पनि झापाको दमकस्थित इलाका प्रशासन कार्यालयमा उपसचिवका रूपमा सरुवा गरिएको सूचीमा उल्लेख छ। गृह मन्त्रालयअन्तर्गत कार्यरत उपसचिव सुधीरकुमार साहलाई महोत्तरीको सहायक सीडीओमा पदस्थापन गरिएको छ।

बाराको सिमरास्थित इलाका प्रशासन कार्यालयमा उपसचिवका रूपमा कार्यरत जनेंद्रप्रसाद कडेललाई मोरङको सहायक सीडीओमा सरुवा गरिएको छ। मोरङको जिल्ला प्रशासन कार्यालयमा सहायक सीडीओका रूपमा कार्यरत पवनराज कोइरालालाई उपसचिवमा सरुवा गरिएको सूचीमा उल्लेख छ।

कारागार प्रशासनतर्फ पनि फेरबदल भएको छ। वीरगन्जस्थित कारागार कार्यालयमा कारागार प्रशासकका रूपमा कार्यरत बाबुलाल रेम्मीलाई राष्ट्रिय परिचयपत्र तथा पञ्जीकरण विभाग, सिंहदरबारमा निर्देशकका रूपमा सरुवा गरिएको छ। सुनसरीको झुम्का कारागारमा कारागार प्रशासकका रूपमा कार्यरत अधिकारीलाई पनि सूचीअनुसार नयाँ जिम्मेवारीमा पदस्थापन गरिएको छ।

गृह मन्त्रालयको निर्णयले मधेश र कोशीका जिल्ला प्रशासन, इलाका प्रशासन तथा कारागार कार्यालयमा जिम्मेवारी हेरफेर गरेको छ। सरुवा तथा पदस्थापनको कार्यान्वयनसँगै सम्बन्धित कार्यालयमा नयाँ अधिकारीले जिम्मेवारी सम्हाल्नेछन्।