रौतहट — रौतहटको माधवनारायण नगरपालिका–६ माधोपुरकी २६ वर्षीया रुबी साहको हत्या प्रकरण अझै अन्यौल अवस्थामा पुगेको छ। मुख्य अभियुक्त मानिएका लक्ष्मण पासवानको मृत्यु भएपछि अब मुद्दा के हुन्छ भन्ने जिज्ञासा थपिएको छ।

अनुसन्धानमा जुटिरहेको प्रहरीले लक्ष्मणलाई नै घटनाको जिम्मेवार मानेको थियो। उनले हत्या स्वीकार गर्दै ९ मिनेट ३६ सेकेण्ड लामो भिडिओ बनाएपछि आत्मदाह गर्ने प्रयास गरेका थिए। प्रहरी नियन्त्रणमा परेपछि उपचारकै क्रममा कीर्तिपुरस्थित बर्न अस्पतालमा उनको मृत्यु भएको थियो।

कानूनविद्हरूका अनुसार अब यो प्रकरण मुद्दा दायर नहुने सम्भावना बलियो बनेको छ। मुलुकी फौजदारी संहिताको परिच्छेद–१२ अनुसार अभियुक्तको मृत्यु भएपछि अनुसन्धान र अभियोग दुबै स्वतः समाप्त हुन्छ। सर्वोच्च अदालतका दर्जनौँ नजिरलाई उदाहरण दिँदै कानुनविद्हरूले लक्ष्मणमाथिको अभियोग अब अघि बढ्न नसक्ने प्रष्ट्याएका छन्।

तर प्रहरी भने अनुसन्धान अझै जारी रहेको दाबी गर्छ। जिल्ला प्रहरी प्रमुख एसपी नेत्रमणि गिरीका अनुसार, घटनामा अरु पनि संलग्न छन् कि भन्ने शंकामा अनुसन्धान भइरहेको छ। पीडित पक्षले समेत एकभन्दा बढी व्यक्तिको संलग्नता रहेको आशंका व्यक्त गरेको प्रहरीको भनाइ छ।

प्रहरीको प्रतिवेदनका आधारमा जिल्ला सरकारी वकिल कार्यालयले मुद्दा नचल्ने भन्दै फाइल बन्द गर्ने सम्भावना छ। तर, यदि अनुसन्धानमा थप संलग्नता देखिएको खण्डमा भने नयाँ अभियोगपत्र दायर हुन सक्ने संभावना पनि जीवित छ।

यसरी, रुबी साह हत्या प्रकरण अहिले मुख्य अभियुक्तको मृत्युले कानुनी प्रक्रियामा अलपत्र परेको देखिए पनि, घटनाको पूर्ण सत्य बाहिर आउँछ कि आउँदैन भन्ने प्रश्न अझै बाँकी नै छ।

अर्कोतर्फ आर्थिक अभावका कारण आरोपी लक्ष्मण पासवानको शव कीर्तिपुर बर्न अस्पतालबाट घर ल्याउन समस्या परेको छ। माधवनारायण नगरपालिका–६ माधोपुरका लक्ष्मण पासवानका बुवा जयनाथ पासवानले पैसा नभएका कारण छोराको शव ल्याउन नसिकएको बताएका छन्।

उनले जनप्रतिनिधिहरूसँग आर्थिक सहयोग मागेका छन्। माधवनारायण नगरपालिकाका मेयर बैजनाथ यादवले लक्ष्मणको शव ल्याउन आफूले सहयोग गर्ने बताएका छन्। ‘लक्ष्मणको शव परिवारजनसम्म पुर्‍याउन सक्दो सहयोग गर्छु भनेको छु। ‘उनको परिवारको अवस्था निकै नाजुक छ।’– मेयर यादवले भने।

रुबीको शव गत शनिबार राति गौर–९ मा मुडवलवा गेट अगाडि सुटकेसमा फेला परेको थियो। त्यसपछि रुबी हत्याका आरोपी लक्ष्मण पासवानले आफ्नै शरीरमा आगो लगाएका थिए। शरीरमा आगो लागेर गम्भीर घाइते भएका उनलाई प्रहरीले उद्धार गरी उपचारमा पठाए पनि उपचारकै क्रममा ज्यान गएको थियो।

यो पनि

• दुई सन्तानका पिता लक्ष्मणको घातक प्रेमः कोठामा ‘बर्थडे सेलिव्रेट’ गरेपछि घाँटी थिचेर रुबीको हत्या
• रुबी हत्या प्रकरणका आरोपी लक्ष्मण पासवानको मृत्यु
• रुबी साह हत्या प्रकरणः आमाले पैसावालसँग सुत्न बाध्य बनाएको र देवरले ब्ल्याकमेल गरेको आरोप
• हातमा रुबीको नामको ट्याटु, छातीमा उनकै फोटोः प्रेमीकाको हत्या गरेपछि लक्ष्मणको विलौना– अव म बाँचेर के गर्नु ?
• विद्यालयदेखिको प्रेम, कोर्ट म्यारिज, विछोड र हत्याः यस्तो छ रुबी साहको हत्या प्रकरणको नालीबेली
• रुबीको हत्या गौरमै भएको खुलासा, हत्या गरेर आरोपी लक्ष्मण पासवान फरार
• रुबीको हत्या प्रकरणः प्रेमीमाथि परिवारको शंका, शव बोक्न प्रयोग भएको इ–रिक्सा चालक पक्राउ
• रौतहटमा सुटकेसभित्र मृत फेला परेकी रुबीको भारतमै हत्या भएको आशंका, फेला परेन मोवाईल
• बन्द सुटकेसभित्र मृत फेला परिन रुबिकुमारी, सल र डोरीले बाँधेर कस्ले फाल्यो सडक किनारमा ?