काठमाडौं– काभ्रेपलाञ्चोकको रोशी गाउँपालिका–५ नागबेलीस्थित ठाकुरानी तामाङको बगैँचामा रहेको बहुमूल्य बोधिचित्त (बुद्धचित्त)को एउटा रुख विहिवार अज्ञात समुहले काटियो।

फूल फुल्दै गरेको बोधिचित्तको रुख फल लाग्नु अघि नै ३ करोडमा बिक्री भएको थियो। तामाङले विक्रीका लागि बैना पनि लिईसकेका थिए। तर, मध्येराति हातहतियारसहित आएको समूहले डरत्रास देखाउँदै बोधिचित्तको रुख काटिदियो।

यतिमात्रै होईन, उक्त समुहले रुख काटेर तामाङको घरको ढोका र आँगनमा चार वटा सकेट बम राख्यो। उक्त बम धुलिखेलस्थित नेपाली सेनाको कालीजङ्ग गणले निस्क्रिय पार्यो, जसका कारण अर्को क्षती भने हुन पाएन।

प्रहरीले बोधिचित्तकाको रुख काटेको आरोपमा हालसम्म ४ जना युवालाई पक्राउ पनि गरेको छ। पक्राउ पर्ने स्थानीय नै छन्। प्रभात तामाङ, श्यामकृष्ण मैनाली, मानबहादुर तामाङ र दुर्गालाल तामाङ पक्राउ परेको धुलिखेल प्रहरीले जनाएको छ।

पीडित ठाकुरानीले पक्राउ परेका चारसहित ८ जनाविरुद्ध आइतबार जिल्ला प्रहरी कार्यालय धुलिखेलमा किटानी जाहेरी पनि दिएका छन्। तामाङका अनुसार ४ वर्षअघि पनि उक्त रुखमा फलेको फल लुटिएको थियो। विहिवार रुख काट्ने समूहले नै उक्त समयमा फल लुटेको हुनसक्ने आशंका प्रहरी र तमाङले पनि गरेका छन्।

तर, उक्त बोधिचित्तको रुख किन काटियो भन्ने विषय अन्यौलमा छ। रुख काटिएको र रुख काट्ने मानिस पक्राउ गरेको विषयमा सर्वत्र चर्चामा रहेपनि संलग्न ब्यक्तिले ३ करोडको फल दिने रुख कुन नियतले काटिदिए भन्ने खुलेको छैन। प्रहरीले समेत यो विषय हालसम्म सार्वजनिक गरेको छ।