विराटनगर– पूर्वपश्चिम राजमार्ग अन्तर्गत मोरङको सुन्दरहरैँचा नगरपालिका–५ दुलारीमा आईतबार दिउँसो हायस गाडीको ठक्करबाट साइकल यात्रीको मृत्यु भएको छ।

पूर्व जाँदै गरेको बागमती प्रदेश ०८–००१ च ०४७ नम्बरको हायसको ठक्करबाटसडक पार गर्दै गरेका साइकल यात्री सुन्दरहरैँचा–४ का ४४ वर्षीय चन्द्रकुमार राईको मृत्यु भएको हो।

दिउँसो करिव ३ बजे हायसको ठक्करबाट गम्भीर घाइते भएका उनलाई उपचारका लागि सुनसरीको धरान स्थित बीपी कोइराला स्वास्थ्य विज्ञान प्रतिष्ठान लगिएको थियो।

उपचारका क्रममा करिव साढे ४ बजे उनको मृत्यु भएको मोरङ प्रहरीका डीएसपी वेदप्रकाश जोशीले जानकारी दिए। प्रहरीले हायस चालक झापाको भद्रपुर नगरपालिका–८ का २६ वर्षीय विशाल दासलाई नियन्त्रणमा लिएको छ।

हायसको तीव्र गति र साइकलयात्रीको असावधानीका कारण दुर्घटना भएको प्रहरीको प्रारम्भिक अनुशन्धानबाट देखिएको छ।