इटहरी — सुनसरीको इटहरी उपमहानगरपालिका–९ का १७ वर्षीय सरोज न्यौपानेको शंकास्पद मृत प्रकरणले गम्भीर चासो र बहस सिर्जना गरेको छ। घटनालाई शंकास्पद भन्दै उनका साथीहरूले निष्पक्ष र गहिरो अनुसन्धान गरी दोषीमाथि कानुनबमोजिम कारबाही गर्न माग गरेका छन्।

प्रहरीले घटनाको अनुसन्धानका लागि सरोजकी सौतेनी आमा मुना न्यौपानेलाई नियन्त्रणमा लिएको जनाएको छ। प्रहरीको प्रारम्भिक अनुसन्धान जारी रहँदा सरोजका साथीहरूले उनी लामो समयदेखि परिवारभित्र मानसिक तथा शारीरिक यातना भोग्दै आएको दाबी गरेका छन्। उनीहरूका अनुसार विशेषगरी सौतेनी आमा र काकाहरूबाट पटक–पटक कुटपिट हुने, खाना नदिई यातना दिने तथा विभिन्न किसिमका दुर्व्यवहार सहनुपरेको विषय सरोजले पटक–पटक सुनाउने गरेका थिए।

साथीहरूले सरोजले शरीरमा भएका कुटपिटका डामसमेत देखाउने गरेको र ‘अब धेरै सहन सक्दिनँ’ भन्दै आफ्नो पीडा व्यक्त गर्ने गरेको बताएका छन्। उनीहरूले सरोजको मृत्यु पारिवारिक यातनासँग जोडिएको हुन सक्ने आशंका व्यक्त गर्दै घटनाको सबै कोणबाट अनुसन्धान गर्न माग गरेका छन्।

मृत्युपछि परिवारका सदस्यहरूको व्यवहार पनि शंकास्पद रहेको आरोप साथीहरूले लगाएका छन्। उनीहरूका अनुसार सरोजको मृत्युपछि अनुहारसमेत हेर्न नदिइएको र घटनालाई ढाकछोप गर्ने प्रयास भएको जस्तो देखिएको छ। यद्यपि, यी आरोपहरूको प्रहरीले हालसम्म आधिकारिक पुष्टि गरेको छैन।

प्रहरीका अनुसार घटनाका सबै पक्षको सूक्ष्म अनुसन्धान भइरहेको छ। अनुसन्धानबाट प्राप्त प्रमाण र तथ्यका आधारमा मात्रै कानुनी प्रक्रिया अघि बढाइने भन्दै प्रहरीले अफवाह वा अपुष्ट सूचना नफैलाउन तथा आधिकारिक जानकारीलाई मात्र विश्वास गर्न आग्रह गरेको छ।

यसैबीच, इटहरी उपमहानगरपालिकाका मेयर हेमकर्ण पौडेलले घटनाप्रति गहिरो दुःख व्यक्त गर्दै सत्यतथ्य सार्वजनिक गर्न सम्बन्धित निकायसँग आग्रह गरेका छन्। उनले सामाजिक सञ्जालमार्फत निष्पक्ष, पारदर्शी र गहिरो अनुसन्धान गरी जो–कोही दोषी देखिए पनि कानुनअनुसार कडा कारबाही हुनुपर्ने बताएका छन्।

मेयर पौडेलले नगरवासीलाई संयमता अपनाउँदै शान्तिपूर्ण रूपमा सत्य र न्यायको पक्षमा उभिन आग्रह गरेका छन्। उनले दिवंगत सरोजप्रति श्रद्धाञ्जली व्यक्त गर्दै शोकसन्तप्त परिवारप्रति समवेदना प्रकट गरेका छन्। साथै, सत्यको खोजीका लागि आवाज उठाइरहेका सरोजका विद्यार्थी साथीहरूको प्रयासको समेत उनले प्रशंसा गरेका छन्।

प्रहरीले अनुसन्धान अझै प्रारम्भिक चरणमै रहेको जनाएको छ। त्यसैले साथीहरूले लगाएका पारिवारिक यातना तथा घटना ढाकछोपको प्रयाससम्बन्धी आरोपहरू अनुसन्धानबाट पुष्टि हुन बाँकी रहेको प्रहरीको भनाइ छ। घटनाको वास्तविक कारण अनुसन्धानपछि मात्रै स्पष्ट हुने अपेक्षा गरिएको छ।