दमक– जापानको फुकुओकामा झापाकी २५ वर्षीया लक्ष्मी राजवंशीको ज्यान गएको घटना एक पुरुषसँगको प्रेम सम्बन्धलाई लिएर दुई महिलाबीच उत्पन्न विवादसँग जोडिएको खुलेको छ। लक्ष्मी र हत्या अभियोग खेपेकी २८ वर्षीया सन्जु तामाङ दुवैको सम्बन्ध एउटै पुरुष प्रविण लामासँग रहेको प्रहरी अनुसन्धानबाट खुलेको छ।

फुकुओका जिल्ला अदालतमा दायर अभियोगपत्रअनुसार सन्जुले अगस्ट १८ को राति लक्ष्मीमाथि घरमै आक्रमण गरेकी थिइन्। अभियोगपत्रमा उनले लक्ष्मीको टाउकोमा भाँडाले पटक–पटक प्रहार गरेको, घाँटीमा डोरी कसेको र त्यसपछि घरको तेस्रो तलाको बरन्डाबाट नदीमा खसालेको उल्लेख छ।

नदीमा डुबेर लक्ष्मीको मृत्यु भएको अभियोगपत्रमा उल्लेख छ। लक्ष्मीको शव भोलिपल्ट अगस्ट १९ मा फुकुओका सहरको तेन्जिन क्षेत्र हुँदै बग्ने नाकागावा नदीमा फेला परेको थियो। उनको टाउकोलगायत शरीरका विभिन्न भागमा चोट देखिएको थियो।

अनुसन्धानका क्रममा प्रहरीले नदीमा शव भेटिएको स्थानभन्दा करिब दुई किलोमिटर माथि रहेको लक्ष्मीको घरमा समेत रगतका दाग र संघर्ष भएको देखिने प्रमाण फेला पारेको थियो। त्यसपछि घटनालाई दुर्घटना नभई हत्या भएको कोणबाट अनुसन्धान अघि बढाइएको थियो।

एउटै पुरुषसँग दुई महिलाको सम्बन्ध
प्रहरी अनुसन्धानअनुसार लक्ष्मी र सन्जुबीच एउटै पुरुष (प्रविण लामा)लाई लिएर विवाद थियो। सन्जु ती पुरुषसँग बस्दै आएको र लक्ष्मीको पनि उनीसँग प्रेम सम्बन्ध रहेको प्रहरीको भनाइ छ। यही सम्बन्धलाई प्रहरीले हत्याको सम्भावित पृष्ठभूमिका रूपमा लिएको थियो।

अर्थात्, जापानमा अध्ययन र काम गर्दै आफ्नो भविष्य बनाउने क्रममा रहेकी लक्ष्मीको ज्यान गएको घटनाको पछाडि व्यक्तिगत सम्बन्धसँग जोडिएको विवाद प्रमुख अनुसन्धानको विषय बनेको थियो। तर प्रेम सम्बन्धकै कारण हत्या भएको भन्ने विषय भने अदालतबाट प्रमाणित हुन बाँकी छ।

हालसम्म सार्वजनिक अभियोगपत्र र प्रहरी अनुसन्धानमा यसलाई घटनाको सम्भावित पृष्ठभूमिका रूपमा प्रस्तुत गरिएको छ।

सुरुमा तीन नेपाली पक्राउ, अन्ततः एक जनामाथि मात्रै मुद्दा
घटना अनुसन्धानका क्रममा प्रहरीले सन्जुसहित तीन नेपाली महिलालाई पक्राउ गरेको थियो। सन्जुसँगै २५ वर्षीया अस्मिता तामाङ र प्रेमी भनिएका २२ वर्षीय प्रवीण लामा पक्राउ परेका थिए। प्रहरीले सुरुमा तीनै जनाको मिलेमतोमा हत्या भएको हुनसक्ने आशंकामा अनुसन्धान अघि बढाएको थियो।

अनुसन्धानका क्रममा भने लक्ष्मीमाथि आक्रमण गर्ने र उनलाई नदीमा खसाल्ने काम सन्जु एक्लैले गरेको निष्कर्षमा प्रहरी पुगेको बताइएको छ। अन्य दुई जनाको भूमिकाबारे समेत अनुसन्धान गरिएको थियो।

अन्ततः मंगलबार सन्जुविरुद्ध हत्या अभियोग दायर गरियो भने अस्मिता र प्रवीणलाई अभियोग नलगाई रिहा गरिएको छ। यसले प्रारम्भिक अनुसन्धानमा उठेका सामूहिक हत्याको आशंकाबाट अन्तिम अभियोगसम्म पुग्दा घटनाको कानुनी तस्वीरसमेत परिवर्तन भएको देखाएको छ।

हत्या अघि निगरानी गरेको आशंका
प्रारम्भिक अनुसन्धानमा प्रहरीले सन्जु घटनास्थल आसपास पहिले पनि पुगेको हुनसक्ने र लक्ष्मी रहेको घरबारे निगरानी गरेको हुनसक्ने कोणबाट समेत अनुसन्धान गरेको थियो।

घटना पूर्वयोजनासहित भएको हुनसक्ने आशंकालाई समेत प्रहरीले अनुसन्धानको दायरामा राखेको थियो। तर अभियोग अदालतमा पुगेपछि यस्ता विषयमा अन्तिम निष्कर्ष अदालतको प्रक्रियाबाटै तय हुनेछन्।

लक्ष्मीको शव भदौमै नेपाल पठाइयो
लक्ष्मी केही वर्षअघि अध्ययनका लागि जापान पुगेकी थिइन्। अध्ययनसँगै काम गर्दै उनले परिवारलाई आर्थिक सहयोग गर्दै आएको उनका अभिभावकले सञ्चारमाध्यमलाई बताएका छन्।

जापानमा भएको घटनापछि उनको शव सेप्टेम्बर ११ मा अन्त्येष्टिका लागि नेपाल पठाइएको थियो। यता, सन्जुविरुद्ध हत्या अभियोग दायर भए पनि उनले आरोप स्वीकार गरेकी छन् वा छैनन् भन्ने विषय सार्वजनिक गरिएको छैन।

अब अदालतमा अघि बढ्ने कानुनी प्रक्रियाले लक्ष्मीको मृत्यु कसरी भयो, घटनामा सन्जुको भूमिका के थियो र अभियोगपत्रमा उल्लेख गरिएका आरोप कति प्रमाणित हुन्छन् भन्ने टुंगो लगाउनेछ।